Holanda shton kufizimet ndaj Covid-19 – Baret dhe restorantet do të mbyllen në orën 17:00, maska e detyrueshme
Qeveria e Holandës ka urdhëruar kufizime të reja, duke përfshirë mbylljen gjatë natës të bareve, restoranteve dhe shumicën e dyqaneve, në përpjekje për të parandaluar përhapjen e infektimeve me Covid-19, që kërcënojnë të mbingarkojnë sistemin e kujdesit shëndetësor në vend. Holanda po regjistron normën më të lartë të infektimeve në Europën Perëndimore, pavarësisht se ka vaksinuar 85% të popullsisë së rritur. Së fundmi, infektimet po rriten mes të rinjve, kryesisht të pavaksinuar.
“Shifrat e infektimeve po rriten nga dita në ditë”, deklaroi kryeministri i Holandës, Mark Rutte, në një konferencë për mediat. Vala e fundit e infektimeve në Holandë, që po kalon 20 mijë raste në ditë, ka vazhduar rritjen pavarësisht masave kufizuese, duke përfshirë mbajtjen e detyruar të maskave dhe mbylljen e bareve dhe restoranteve pas orës 20:00, masa që u prezantuan më herët gjatë këtij muaji. Ndërsa, në konferencën e së premtes Rutte njoftoi se dyqanet jo thelbësore do të mbyllen në orën 17:00, ndërsa maskat do të jenë të detyrueshme në shkollat e mesme.
Gjithashtu, qeveria ka bërë thirrje që kushdo që mundet duhet të punojë nga shtëpia. Disa ekspertë kishin argumentuar se do të ishte e nevojshme një mbyllje totale afatshkurtër, për të ulur infeksionet. Në anën tjetër, zyrtarët e zbatimit të ligjit po përgatitet për trazira të mundshme. Një propozim i qeverisë, i cili nuk ishte kthyer ende në ligj, për të ndaluar të pavaksinuarit të futeshin në bare apo në vende të tjera publike, shkaktoi 3 netë trazirash fundjavën e kaluar. Ndërkohë, spitalet holandeze u udhëzuan të shtyjnë të gjitha operacionet jo urgjente, për të liruar shtretërit për njësitë e kujdesit intensiv. Madje disa pacientë janë transferuar në Gjermani.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.