Hotelet e Veriut, më pak të vizituarat në të gjithë Shqipërinë. Numri i pushuesve bie me 60%
Hotelet në veri kanë pasur rënien më të madhe të vizitorëve apo pushuesve në Tremujorin e Tretë të këtij viti. Sipas raportit më të fundit të Institutit të Statistikave mbi strukturat akomoduese, Rajoni i Veriut ka pasur 57.4% më pak vizitorë në periudhën korrik – gusht – shtator 2020, krahasuar me të njëjtën periudhë të një viti më parë.
Shifrat e Instat tregojnë se në Tremujorin e Tretë të 2020-ës, strukturat akomoduese në Rajonin e Veriut kanë pasur 83 mijë e 108 vizitues, nga 194 mijë e 992 që ishin në të njëjtën periudhë të vitit 2019.
Sidoqoftë, numri i vizitorëve në Tremujorin e Tretë të vitit ka rënë për çdo strukturë akomoduese kudo në vend. Sipas Instat, numri i vizitorëve gjithsej është ulur me 43.3 %, në krahasim me Tremujorin e Tretë 2019.
Periudha korrik – gusht – shtator 2019 ka pasur 646 mijë e 152 vizitorë, ndërsa për po të njëjtën periudhë të këtij viti, shifra ra në 372 mijë e 301 vizitorë.
Nga ana tjetër, edhe numri i netëve të qëndrimit në periudhën korrik – gusht – shtator 2020 është ulur me 44.9%, krahasuar me të njëjtën periudhë të vitit paraardhës.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.