Hotelet në Azi, ku për 18$ mund të flesh gjumë në kapsula të ngushta
Mund të duket si diçka që mund të shohësh vetëm nëpër filma, por këto dhomëza gjumi janë jo vetëm ekzistojnë, por janë hapur për herë të parë që në vitin 1979 në Japoni.
Nevoja për të kursyer hapësirë, si edhe kërkesa e lartë e klientëve të ndryshëm që nuk duan të shpenzojnë shumë për fjetjen, ka bërë që këto hotele kapsula të shtrihen në të gjithë Azinë, madje edhe në Europë.
Në Kinë hoteli i parë i këtij lloji u hap në vitin 2012, ndërsa në 2014-ën Belgjika ndoqi shembullin duke hapur të parin hotel kapsulë në Europë. Një vit më vonë edhe një hostel i vogël i tillë u hap në Islandë, ndjekur nga Terminali 3 në aeroportin e Manilas në Filipine.
Kapsulat zënë zakonisht jo më shumë se 2.5 metra kub hapësirë dhe përveç një krevati dhe një jastëku, mund të përfshijnë edhe një televizor, një panel elektronik, si edhe lidhje wireless.
Dhomat janë të ndara me numra dhe të rreshtuara ngjitur njëra pas tjetrës në dy kate me kapsula; çka sjell shpesh krahasimin me sirtarët e kufomave në një morg.
Hapja e kapsulës mund të mbyllet me perde ose me një derë plastike, ndërsa bagazhet e këpucët ruhen në një dollap personal. Tualeti është i përbashkët, ndërsa në varësi të hotelit, ai mund të ofrojë edhe restorant, pishina, palestra, etj.
Çmimi i ulët është sigurisht përfitimi kryesor nga këto hotele dhe varion nga 18-37 dollarë për natë.
Ndër klientët më të shpeshtë janë turistët që duan të shpenzojnë pak para, njerëzit të cilët kanë pirë shumë alkool dhe nuk mund të kthehen të sigurt në shtëpi, si edhe të papunë, apo njerëz të paguar shumë pak, të cilët gjatë krizave ekonomike shndërrohen në të pastrehë.
Versionet perëndimore të këtyre hoteleve, zgjedhin të ofrojnë zakonisht më tepër kushte, përfshirë edhe tualete private.
Megjithatë një përdorim të gjerë, koncepti po e gjen në Kinë, ku ekonomia e ndarjes së gjërave po mbizotëron gjithmonë e më tepër. Pas kompanive që ofrojnë ndarje të biçikletave, motorëve, madje edhe çadrave, tashmë edhe kjo formë hotelesh po gjen shtrirje masive.
Xiangshui Space, një start-up i cili lançoi shërbimin në Pekin në muajin Maj, ka hapur deri më tani hotele të tilla edhe në Shanghai dhe Chengdu, me planet që të shtrihet brenda Gushtit edhe në Qingdao, Nanjing dhe Shenzhen.
Gjatë ditës, klientët kryesorë janë punonjës të cilët duan një sy gjumë të shpejtë dhe çmimi arrin zakonisht në 10 juanë për gjysmë ore. Në oraret e tjera, një kapsulë mund të kushtojë deri në 2 dollarë ora.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.