Hotelet rrisin çmimet me 4% – Topuzi: Standarde më të mira shërbimi, në rajon rritja 5%
Rreth 4% ka qenë rritja e çmimeve në hotelet përgjatë bregdetit në jug të vendit këtë sezon veror . Sipas kreut të Shoqatës së Hoteleri –Turizëm, Zak Topuzi, kjo rritje është bërë në saj të një cilësie më të lartë shërbimi krahasuar me vitet e tjera por edhe të kërkesës së lartë , topuzi shtoi për televizionin SCAN se rritja e çmimeve mbetet më e vogël krahasuar me atë që kanë bërë vendet e rajonit, të cilat janë mbi 5%.
Në një vëzhgim të bërë në adresat on line, siç është dhe ajo booking.com, rezulton se çmimet në hotelet e jugut në këtë sezon variojnë nga 25 euro nata çmimi më i ulët deri në 180 euro nata. Të kontaktuar nga SCAN menaxherë të disa prej hoteleve pohojnë se kanë rritur çmimet ndërsa të tjerë kanë preferuar të mos i ndryshojnë ato, ndërkohë që ajo që vihet re është se këtë vit ka pasur më shumë turistë nga vendet e lindjes ndryshe nga një vit më parë ku dominonin ata nga Kosova.
Sipas kreut të shoqatës së Hoteleri –Turizmit ka ndodhur një shtresëzim i turistëve ku më të pasurit kanë zgjedhur jugun . Ndërkohë risi për këtë vit ka qenë zgjatja në kohë e kontratave, deri në 160 ditë nga 140 që kanë qenë në 2017-ën .
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.