HSBC del nga tregu retail në SHBA / Shet njësitë me humbje për t’u përqendruar tek tregu aziatik
Gjiganti bankar HSBC lajmëroi se do tërhiqet nga tregu retail amerikan, duke shitur disa pjesë të biznesit me humbje dhe redukutar të tjerë, një lëvizje që pritej prej kohësh, ndërkohë që huadhënësi po përqendrohet në Azi, që është tregu më i madh. Banka, që është më e madhja në Evropë nga aktivet, është përpjekur prej vitesh të tkurr prezencën në disa tregje evropiane dhe të Amerikës së veriut, ku ka hasur vështirësi nga konkurrentë më të mëdhenj lokalë. Banka deklaroi se do të dalë nga bankingu retail për shumicën e klientëve individë dhe biznese, por do të mbajë një prezencë të vogël fizike në SHBA, për t’i shërbyer klientëve. “Ata janë biznes i mirë, por ne na mungon përmasa për të konkurruar”- tha Noel Quinn, ekzekutivi i grupit HSBC. Banka shpalosi në Shkurt një strategji që përqëndrohet kryesisht tek menaxhimi i pasurisë në Azi dhe në të njëjtën kohë theksoi se po eksploron opsione për bankingun retail në SHBA.
HSBC po synon gjithashtu të shesë operacionet e bankingut retail në Francë, si pjesë e të njëjtës strategji, dhe ka hyrë në fazën përfundimtare të negociatave për të shitur atë biznes tek firma e kapitalit privat Cerberus. Citizens Bank ka rënë dakord të blejë bankingun individual dhe bizneseve të vogla në bregun lindor, përfshirë 80 degë, ndërsa Cathay Bank, ka rënë dakord të blejë biznesin në bregun perëndimor, që përfshin 10 degë, sipas një deklarate të HSBC.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.