HSBC do listohet në Kinë – E para firmë e huaj, do përdorë lidhjen e bursës së Londrës me Shangain

Banka më e madhe në Europë nga aktivet, pritet të kthehet në kompaninë e parë të huaj që tregtohet në bursat kineze, nëpërmjet një lidhje mes bursës së Londrës dhe atë të Shangait. Lidhja e dy bursave synon që ta kthejë bankën në të parën që ofron “Certifikatë të Depozitave Kineze”, një letër me vlerë e tregtueshme që reflekton aksione të listuara në një vend tjetër.

Ndërlidhja e bursës së Londrës me atë të Shangait është një nga planet për të lidhur tregun e aksioneve të kinës me tregjet e vendeve të tjera. Skema lejon të lidhë bursën e Londrës dhe atë të Shangait, duke i mundësuar investitorëve globalë akses në aksionet e kompanive kineze si dhe një shans investitorëve kinezë që të blejnë aksione në bursën e Londrës.

Sipas analistëve, kjo është një arritje pasi përbën herën e parë që investitorët kineze mund të tregtojnë në bursë një kompani të huaj në tregun e tyre vendas. Lidhja tregtare, që pritet të nisë në fund të këtij viti, vjen ndërkohë që Kina po përpiqet të hapë tregun e aksioneve ndaj investitorëve ndërkombëtarë.  Ofruesi i Indekseve MSCI, përfshiu më herët gjatë vitit aksionet kineze në indeksin e tregjeve në zhvillim, që ndjek 1.9 trilionë dollarë aktive.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.