HSBC gjobitet me 85 mln dollarë/ Rregullatorët thonë se ka dështuar me parandalimin e pastrimit të parasë
Rregullatori financiar i Britanisë deklaroi se ka gjobitur gjigantin bankar HSBC me 85.2 milionë dollarë, pasi ka dështuar në procesin e parandalimit të pastrimit të parasë.
Autoriteti i Mbikqyrjes Financiare (FCA) theksoi se ka zbuluar që 3 pjesë të rëndësishme të sistemit të monitorimit të transaksioneve të HSBC në Britani, kanë pasur dobësi të mëdha në një periudhë 8-vjeçare, nga 2010-a në 2018-n. Gjoba vjen në një kohë të rritjes së mbikqyrjes rregullatore ndaj dështimet në parandalimin e pastrimit të parave. Në nisje të javës, rivali vendas i HSBC, NatWest, u gjobit me 352 milionë dollarë, nga një gjykatë britanike, për dështimin e parandalimit të pastrumit të thuajse 530 milionë dollarë, ku një pjesë e shumës është depozutar në një degë në qese mbeturinash.
Autoriteti i Mbikqyrjes Financiare bëri të ditur se HSBC ka bërë një serë dështimesh, përfshirë monitorim të papërshtatshëm të pastrimit të parasë dhe skenaret e financimit terrorist deri në vitin 2014, si dhe vlerësim të dobët të riskut të skenareve të reja pas 2016-s. Banka u zbulua gjithashtu se ka patur testime të papërshtatshme dhe nuk ka kontrolluar përpikmërinë e të dhënave në sistemet e monitorimit.
HSBC nuk ka kundërshtuar zbulimet, ç’ka solli reduktimin e penalitetit nga 120 milionë dollarë, në 85 mln. Banka është detyruar të ashpërsojë kontrollet e parandalimit të pastrimit të parasë në nivel botëror, pas këtyre skandaleve. Në vitin 2012, institucioni u desh të paguajë 1.9 miliardë dollarë gjobë tek rregullatorët amerikanë, pasi ka luajtur rolin e ndërpjetësit për kartelet meksikane të drogë. FCA deklaroi se gjoba nuk lidhet me veprimet në SHBA.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.