Huadhënia, “zbehet” ritmi – Eurozonë, ndalet rritja ndaj korporatave
Rritja e kreditimit në Eurozonë ndaj korporatave u ngadalësua ndjeshëm gjatë muajit Qershor, ndërkohë që huadhënia ndaj familjeve vijon të mbetet pranë nivelit më të lartë që prej viteve të pas krizës financiare globale. Edhe indikatori M3, që mat nivelin e parasë në qarkullim është regjistruar në nivele të pandryshuara gjatë Qershorit, tregojnë të dhënat e fundit të Bankës Qendrore Europiane.
Huadhënia ndaj korporatave u rrit me 2.1% gjatë muajit të kaluar, çka shënon një ngadalësim në krahasim me hapin e Majit, kur kreditimi rritej me 2.5%. Në muajin Maj regjistrohej rritja më e madhe që prej vitit 2009. Ky ngadalësim mund të rrisë shqetësimet mes politikëbërësve të Bankës Qendrore Europiane, pasi rimëkëmbja e kreditimit ka qenë një indikator i fortë i rimëkëmbjes ekonomike dhe efektshëmrisë së politikave monetare ultra-lehtësuese.
Huadhënia ndaj familjeve ndërkohë u rrit me 2.6% gjatë Qershorit, në nivel të pandryshuar në krahasim me majin, dhe pranë nivelit më të lartë që prej marsit të 2009. Indikatori M3 nga ana tjetër u rrit lehtë në krahasim me majin.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.