Huaja 16 milionë dollarë për Tiranë-Elbasan-Ku do të shkojnë fondet dhe çfarë punimesh do të kryhen (Relacioni)
Pak ditë më parë Këshilli i Ministrave ka miratuar marrëveshjen e huasë 16 milionë dollarë me Fondin e OPEC-ut për Zhvillim Ndërkombëtar. Ky fond do të përdoret për për projektin e punimeve për riparime emergjente të autostradës Tiranë-Elbasan. Marrëveshja ka kaluar tashmë në Kuvend, sëbashku me relacionin përkatës.
Objektivat
Objektivat kryesorë të projektit për riparimet emergjente të punimeve civile për segmentit nr.1, Sauk – Hyrje, Tuneli i Kërrabës, janë sigurimi i rrjedhës së pandërprerë të trafikut lidhur me pjesën tjetër të rrugës Tiranë–Elbasan, tashmë të përfunduar, ulja e kostos operative të automjeteve, ulja e aksidenteve rrugore, kursimi i kohës së udhëtimit dhe realizimi i rritjes ekonomike në zonën e projektit. Riparimi emergjent i punimeve civile do të lejojë, gjithashtu, vënien në përdorim të plotë të rrugës Tiranë–Elbasan, me gjatësi prej 27 km, për të lehtësuar trafikun, duke siguruar mundësi më të shpejtë arritjeje në zonat bregdetare, në terrenet malore dhe zonat rurale të Elbasanit, si dhe do të sigurojë një lidhje të rëndësishme me Maqedoninë dhe Greqinë fqinje, duke rritur aktivitetet tregtare, tranzitin dhe turizmin në Shqipëri
Si do të përdoren fondet
Referuar relacionit, nevoja për financim shtesë ka ardhur si rezultat i problematikave të shumta që janë hasur gjatë zbatimit të këtij projekti e shkaqet kryesore që kanë ndikuar në mosfinalizimin e projektit lidhen me problemet gjeologjike, e konkretisht, rrëshqitjet në km 11+100 (Ibë), km 13+150, km 14+000, si dhe lëvizjet gjeoteknike në zonën e Mulletit, km 4+000.
“Bazuar në analizat financiare të gjendjes aktuale të fondeve, për përfundimin e plotë të veprës, do të duhet të akordohen fonde shtesë në vlerën prej 16 000 000 USD-sh. Në këtë vlerë përfshihen realizimi i punimeve civile emergjente, si pasoje e fenomeneve gjeologjike, të cilat reflektuan humbjen e qëndrueshmërisë së shpateve rrugore dhe sollën si pasojë aktivizimin e rrëshqitjeve përgjatë gjurmës së projektit, shërbimet e konsulencës dhe të njësisë së zbatimit të projektit” shkruhet në relacion.
Për realizimin e punimeve civile emergjente është parashikuar një fond prej 14 milionë e 860 mijë dollarësh, nëpërmjet të cilit do të financohen punimet civile emergjente që do të kryhen për kompletimin e segmentit 1, me një gjatësi prej 13 km, të rrugës Tiranë–Elbasan, veçanërisht për përfundimin e rehabilitimit të rrëshqitjeve në km 4+000 (Mullet), km 11+000 (Ibë), km 12+000, km 13+150, km 14+150. Gjatësia totale e zonave problematike, ku është i nevojshëm përfundimi i rehabilitimit, është 4 km.
Zërat kryesorë që kanë peshën më të madhe në këto punime janë gërmimet, riprofilimet e skarpateve, si dhe aplikimi i masave mbrojtëse ndaj tyre të cilat stabilizojnë përfundimisht rrëshqitjet e shpateve rrugore, spostimet e rrjeteve të shtyllave të tensionit të lartë, studimet dhe monitorimet gjeologjike e gjeoteknike, mbrojtjet e zonës lumore etj.
Për shërbimet e konsulencës është parashikuar vlera prej 1100 000 USD-sh për periudhën kohore deri në dhjetor të vitit 2018, si dhe për një vit periudhë defektesh. Për shpenzimet e njësisë së menaxhimit të projektit është parashikuar fond prej 40 000 USD-sh, i cili është i nevojshëm për periudhën e defekteve.
Kushtet e huasë
Referuar marrëveshjes, huaja 16 milionë dollarë që do të sigurohet nga Fondi i OPEC-ut për Zhvillim Ndërkombëtar ka një interes prej 2.75 % normë vjetore, tarifa e shërbimit 1% normë vjetore që aplikohet mbi shumën e disbursuar dhe të pashlyer të kredisë. Ndërkohë, maturimi është 20 vjet, duke përfshirë periudhën prej 5 vjetësh pa pagesë principali.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.