Huatë me probleme, pranë minimumit historik – Ngjiten lehtë në 8.2% gjatë janarit, por nën nivelin e janarit 2020
Norma e huave me probleme ndaj totalit të huasë të sektorit bankar gjatë muajit janar të këtij viti është ngjitur lehtë, pranë 8.2%, ndërkohë që muajin paraardhës fiksohej në 8.1%, tregojnë shifrat zyrtare nga Banka e Shqipërisë. Pavarësisht rritjes së lehtë gjatë muajit të parë të vitit, norma rezulton të jetë më e ulët se janari i vitit paraardhës, prej 0.1 pikë përqindje diferencë.
Kjo normë, që mbetet pranë minimumeve historike në vendin tonë është një ndër treguesit më të rëndësishëm të shëndetit bankar, dhe fakti që pandemia nuk e ka ndikuar për keq, përkundrazi, sinjalizon jo vetëm gjendjen e mirë të sektorit bankar, por edhe të ekonomisë në tërësi, duke qenë se mos rritja e normës së kredive jo-performuese në kohë krize reflekton mos cenimin e aftësisë paguese të individëve apo bizneseve.
Në muajin qershor të vitit të kaluar, pra në kulm të krizës është regjistruar edhe minimumi historik i regjistruar ndonjëherë në vendin tonë i këtij treguesi, prej 8.09%. Institucione të ndryshme, vendase dhe të huaja, që nga Banka e Shqipërisë, deri të Moody`s apo Banka Botërore kanë nënvizuar vazhdimisht se kriza e gjeti sektorin bankar në vend të mirë përgatitur dhe se ky sektor ka qenë një ndër shtyllat kryesore ku është mbështetur ekonomia shqiptare gjatë njërës prej periudhave të saj më të vështira, rrjedhojë e pandemisë së shkaktuar nga covid-19.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.