Huawei hap laboratorin 5G në Korenë e Jugut, por mbetet diskret pas ndalimit të SHBA
Kompania Huawei technology ka hapur, të enjten, një laborator për rrjetin 5G të gjeneratës së re në Korenë e Jugut. Projekti u paraqit pa shumë publicitet duke patur parasysh futjen e kompanisë në listën e zezë tregtare nga SHBA, një aleat shumë i rëndësishëm i sigurisë së vendit aziatik.
Gjigandi kinez i teknologjisë, prodhuesi më i madh i pajisjeve të telekomit në botë, tha se kishte planifikuar të investonte rreth 5 milionë dollarë në laborator në lagjen Junggu të Seulit, por nuk ofroi më detaje mbi lokacionin dhe nuk ftoi median për të marrë pjesë në event.
“Duke u bazuar në filozofinë e ‘Në Kore dhe për Korenë’ dhe në fuqinë e rrjetit të vet 5G, Huawei do të ndërtojë një ekosistem 5G përmes bashkëpunimit me një numër të ndërmarrjeve të TIK të Koresë së Jugut dhe sidomos ndërmarrjeve të vogla dhe të mesme,” bëri me dijë dega e kompanisë në Kore.
Ngjarja megjithatë nuk vëmendjen e duhur për shkak të luftës tregtare me SHBA, e cila ka ndaluar tërë firmat amerikane të teknologjisë dhe telekomit për të bërë biznes me Huawei. Uashingtoni po u kërkon gjithashtu aleatëve të saj që të pengojnë kompaninë kineze nga rrjetet e tyre 5G.
Laboratori në Korenë e Jugut është qendra e parë e zhvillimit të shërbimeve 5G të Huawei në botë që do të lejojë kompani të tjera për të testuar platformat e tyre, sipas kompanisë.
Aktualisht, Huawei ofron pajisjet e saj të rrjetit 5G për një kompani të vogël të Koresë së Jugut, LG Uplus. LG Uplus ka thënë se nuk planifikon të heqë pajisjet e Huawei, por premtoi të rritë kontrollet e sigurisë. Dy transportuesit më të mëdhenj, SK Telecom dhe KT, nuk përdorin pajisjet Huawei.
Burimi: Reuters
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.