Humbjet e energjisë në rrjet – OST raporton përkeqësim në 2018-ën: Do rriten shpenzimet për t’i mbuluar

Rritja e prodhimit të energjisë elektrike, si pasojë e kushteve të mira hidrike që kaloi vendi në 6-mujorin e parë të vitit 2018, ka krijuar një efekt negativ për Operatorin e Sistemit të Transmetimit në drejtim të humbjeve në energjisë në rrjet. OST raporton rritjen e këtij treguesi, ndërsa këtë përkeqësim e argumenton pikërisht me volumin e shtuar të energjisë të injektuar në rrjet.  Për vitin 2018 në sistemin e  transmetimit hynë 9876 GWh energji, apo rreth 23% më shumë në krahasim me një vit më parë, çka tejkaloi programin e hartuar nga OST mbi humbjet.

Kjo do të thotë se OST do të shpenzojë më shumë para’ për mbulimin e  këtyre humbjeve. Ndërkohë që, sipas dokumenteve që TV SCAN i disponon, për këtë vit ky dikaster pritet të shpenzojë 1.4 mld lekë për prokurimin e humbjeve në rrjet, apo 100 mln lekë më shumë në krahasim me vitin 2018, ku u shpenzuan 1.3 mld lekë.

Ndërkaq, sa I takon tendencës së humbjeve vihet re një rritje nga vitit në vit, ku në 2015-ën, u regjistrua në 2.03%, në 2016, 2.06%, në vitin 2017 arriti në 2.10%, ndërkohë që në vitin 2018 humbjet u regjistruan në 2.46% të totalit të energjisë së transmetuar.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.