Hungarezët nuk ndalen – Mijëra marrin pjesë në “marshimin e paqes”
Mijëra hungarezë protestuan në Budapest të Premten, në atë që u cilësua si marshimi i paqes.
Marshimi i fundit pason një sërë demonstratash kundër qeverisë, të javës së kaluar. Këto protesta, si rrallëherë më parë kanë nxitur partitë opozitare që të bashkohen kundër Kryeministrit Viktor Orban. Kalimi i dy ligjeve javën e kaluar, me mbështetjen e partisë së Orban, u bë edhe shkaku i protestave masive.
Njëri prej tyre është cilësuar si ligji i `skllavërisë`, dhe që i lejon punëdhënësit të kërkojnë më shumë se 400 orë në vit punë shtesë nga punëmarrësit. Ligji tjetër i referohet krijimit të gjykatave të tjera, që sipas sektorëve mund të `kapen` nga politika. Protestat janë organizuar fillimisht nga partia që mban emrin “qeni me dy bishta”.
Kjo parti nisi dhjetë vite më parë si një shaka, por tashmë është kthyer në një parti gjysëm serioze, që përdor humorin për t`u përballur me çështjet reale dhe ato që shqetësojnë njerëzit. Protestuesit kundërshtojnë edhe shumë gjëra të tjera, si largimi i Universitetit Europian Qendror, të themeluar nga George Soros. Viktor Orban e përjashtoi universitetin e miliarderit nga vendi.
Sipas Orban, këto demonstrata janë të financuara pikërisht nga George Soros. Ky i fundit ndërkohë e ka mohuar këtë akuzë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.