Hungari, optimizëm mbi vaksinën kineze. Autoritetet: “Është cilësore, efikase dhe e sigurtë. Do mposhtim pandeminë!”
Kreu i Institutit të Farmacisë në Hungari (OGYEI), Matyas Szentivanyi, tha se vaksina e Covid-19 e prodhuar nga Sinopharm e Kinës, është “efikase dhe e sigurtë”, ndërkohë që shteti europian përgatitet të imunizojë qytetarët me vaksinën kineze. Instituti hungarez miratoi vaksinën e Sinopharm më 29 Janar, pasi dërgoi dy prej ekspertëve të shëndetësisë në Kinë në muajin Dhjetor, për të hetuar prodhimin dhe cilësinë e vaksinës. Hungaria u bë më vonë vendi i parë anëtar i Bashkimit Europian që blen dhe autorizon përdorimin e vaksinës së covid-19 të Sinopharm, duke arritur një marrëveshje për 5 milionë doza më 29 Janar.
“Nëse po vlerësojnë një ilaç apo vaksinë, ne vlerësojmë 3 gjëra kryesore; cilësinë, efikasitetin dhe sigurinë. Ajo që shohim me vaksinën kineze të Sinopharm është se dokumentacioni i cilësisë është ok. Prova klinike e fazës së tretë ishte absolutisht e kënaqshme. Mund të them që kjo vaksinë është e sigurtë dhe efikase. ”
Hungaria mori ditën e Martë dërgesën e parë prej 550,000 doza të Sinopharm, që janë mjaftueshëm për të vaksinuar 275,000 hungarezë. Kjo do të përshpejtojë programin e imunizimit të Hungarisë, që ishte ngadalësuar më parë prej vonesave në dërgesat e disa prej kompanive europiane dhe amerikane të farmaceutikës, sipas Szentivanyi. Ai shtoi se importi gjigant i vaksinës kineze i ka dhënë hungarezëve shpresë për të mposhtur pandeminë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.