Hyjnë në fuqi kartelat e reja kadastrale – Do të përmbajnë vlerën financiare, rivlerësimin, aktin e fitimit të pronësisë dhe kufizimet
Janë publikuar në Fletoren zyrtare modelet e reja të Kartelave të Pasurisë që do u jepen qytetarëve nga zyrat e kadastrave. Ajo tashmë do të jetë e organizuar në pesë seksione për të pasqyruar të dhëna të detajuara të pronës, vlerës financiare, rivlerësimit, kufizimeve pronësore, si dhe të dhënat e personave që kryejnë veprimet kadastrale.
Në seksionin A do pasqyrohen indeksi i hartës si dhe vlera financiare e pasurisë. Seksioni B do të rezervohet për të dhënat mbi pronarin, pjesën takuese dhe adresën e pronës, i shoqëruar nga Seksioni B/1 ku do të pasqyrohen të dhënat e regjistrimit paraprak.
Seksioni C, i dedikohet “Të drejtave reale”, dhe përmban të dhënat për të drejtat e të tretëve mbi pasurinë. Këtu pasqyrohen vetëm ato të drejta të të tretëve, që nuk kufizojnë tagrin e disponimit.
Seksioni D, “Kufizimet e pronësisë”, përmban të dhëna për të drejtat e të tretëve mbi pasurinë. Këtu pasqyrohen edhe të dhënat për çdo akt tjetër që kufizon këtë tagër.
Seksioni E, “Informacione të tjera për pronën”, përmban çdo të dhënë tjetër me karakter informues dhe jothelbësor apo kufizues mbi pronësinë, pavarësisht natyrës së aktit ose dokumentacionit ligjor që shërben si burim i këtij Informacioni.
Seksioni F, i rezervuar për “Veprimet me kartelën e pasurisë”, përmban të dhëna identifikuese për punonjësit që kanë kryer veprime me kartelën e pasurisë së paluajtshme. Ky seksion i modelit të kartelës është pjesë e sistemit digjital të pasurive të paluajtshme, por nuk është publik dhe nuk përfshihet në dokumentin elektronik që u vendoset në dispozicion të tretëve.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.