Hyjnë në fuqi ndryshimet e kontratës së koncesionit për Milot-Morinë! Rregullimet e tunelit të Kalimashit i kalojnë koncesionarit
Është miratuar kontrata shtesë e koncesionit për ndërtimin, përmirësimin dhe mirëmbajtjen e autostradës Milot-Morinë. Bazuar në vendimin e publikuar në ‘Fletoren Zyrtare’, shoqëria koncesionare e përzgjedhur për të realizuar projektin do të mbajë përgjegjësi të plotë për zbatimin e punimeve dhe rivendosjen e Tunelit të Thirrës gjatë gjithë periudhës së koncesionit.
Fillimisht punimet do të përballohen nga shoqëria koncesionare, e më pas me sigurimin e fondeve nga autoriteti kontraktor do të bëhet edhe rimbursimi i kësaj vlere. Shoqëria koncesionare duhet të rregullojë defektin brenda 20 ditësh nga hyrja në fuqi e kësaj shtese të kontratës së koncesionit.
Aneks kontrate nr. 3 i kontratës së koncesionit:
- Shoqëria koncesionare do të rregullojë defektin e fshehtë (me anë të zëvendësimit), sipasvlerësimit të kostos së rregullimit të defekteve të fshehta sipas afateve të përcaktuara në tabelën nr. 1 bashkëlidhur.
- Shoqëria koncesionare do të mbajë përgjegjësi të plotë për ekzekutimin e punimeve dhe rivendosjen e Tunelit të Thirrës, në gjendje të sigurt operimi, përgjatë gjithë kohëzgjatjes së periudhës së koncesionit.
- Punimet për rregullimin e defektit të fshehtë në Tunelin e Thirrës do të përballohen fillimisht nga shoqëria koncesionare dhe më pas me sigurimin e fondeve nga autoriteti kontraktor, do të kryhet rimbursimi i kësaj vlere shoqërisë koncesionare, për aq sa do të faturohet, por jo më shumë se vlera e përcaktuar në tabelën nr. 2 bashkëlidhur këtij aneksi të kontratës.
- Afati i rregullimit të defektit të fshehtë nga shoqëria koncesionare është brenda 20 ditësh nga hyrja në fuqi e kësaj shtese të kontratës së koncesionit.
- Palët bien dakord dhe pranojnë se ky aneks nr. 3, është pjesë e pandashme e kontratës së koncesionit
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.
Artikujt e fundit
