Hyjnë në fuqi ndryshimet e reja ligjore – Manastirliu: Garantojnë mbrojtje për gratë që përballen me dhunën në familje
Duke nisur nga kjo javë, kanë hyrë në fuqi ndryshimet e reja ligjore për masat ndaj dhunës në marrëdhëniet familjare, të miratuara në Kuvendin e Shqipërisë më 28 korrik të këtij viti. Lajmin e ka bërë të ditur ministrja e Shëndetësisë dhe Mbrojtjes Sociale, Ogerta Manastirliu, gjatë një vizite me gratë e strehuara në Qendrën Kombëtare të Trajtimit të Viktimave të Dhunës në Familje.
Ministrja tha ndryshimet ligjore garantojnë mbrojtje për gratë që përballen me dhunën në familje që në momentin e parë të denoncimit në polici. Kështu, me ligjin e ri do të garantohet urdhër paraprak i menjëhershëm i mbrojtjes për viktimat e dhunës, për të vijuar më tej me masat e tjera të parashikuara.
Trajtimi i viktimave të dhunës, riintegrimi i tyre në shoqëri si dhe zgjerimi i mbrojtjes përtej marrëdhënies juridike burrë-grua duke parashikuar masa mbrojtëse për gratë dhe vajzat janë edhe disa nga risitë që kanë sjellë ndryshimet e reja ligjore. Këto të fundit synojnë parandalimin dhe uljen e numrit të rasteve të dhunës në familje.
Në këtë kuadër, Manastirliu vuri theksin te sistemi i denoncimit, që sipas saj duhet të punohet më shumë për forcimin e tij në këtë aspekt. Më tej, ministrja vuri theksin edhe tek ndryshimet ligjore që garantojnë mbrojtje më të mirë për fëmijët, pasi për herë të parë, me urdhrin e mbrojtjes për nënën, automatikisht do të garantohet urdhri i mbrojtjes për fëmijët, edhe nëse mbi ta nuk është ushtruar dhunë e drejtpërdrejtë.
Ndërkohë, në Qendrën Kombëtare të Trajtimit të Viktimave të Dhunës në Familje aktualisht trajtohen 53 përfitues, nga të cilët 34 janë fëmijë. Përfituesit marrin shërbime të ndryshme si shërbime psikologjike, strehim, shërbime psiko-sociale, juridike, mjekësore, arsimore dhe programe të riintegrimit.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.