Hyn në fuqi rregullorja e re e BE-së për mbrojtjen e të dhënave – Gjoba të rënda për shkelësit
Duke filluar nga dita e sotme një rregullore e re ka hyrë në fuqi, e cila i detyron kompanitë të jenë më të vëmendshme ndaj të dhënave të konsumatorëve të Bashkimit Europian.
Rregullorja e re parashikon masa të rënda ndëshkuese për kompanitë e sidomos për ato teknologjike të cilat keqpërdorin të dhënat e përdoruesve.
Rregullorja e Përgjithshme e Mbrojtjes së të Dhënave të Bashkimit Evropian (GDPR) zëvendëson rregullat e bllokut që datojnë në 1995 dhe njofton një epokë ku thyerja e ligjeve të privatësisë mund të sjellë gjoba deri në 4 për qind të të ardhurave globale ose 20 milion euro.
Mbrojtësit e privatësisë i kanë “duartrokitur” shumë këto ligje të reja për mbrojtjen e privatësisë në dhe i kanë quajtur ato të domosdoshme për epokën në të cilën po jetojmë, atë të internetit, dhe u bëjnë thirrje edhe vendeve të tjera të ndjekin po këtë model evropian.
Ndërsa kritikët thonë se këto rregulla të reja janë shumë të rënda sidomos për bizneset e vogla. Ndërsa reklamuesit shqetësohen pasi do ta kenë shumë më të vështirë për të gjetur klientë pas këtyre rregullave.
Rregullorja e Përgjithshme e Mbrojtjes së të Dhënave të Bashkimit Evropian, sqaron dhe forcon të drejtat ekzistuese individuale, të tilla si e drejta për të fshirë të dhënat dhe e drejta për të kërkuar një kompani për një kopje të të dhënave personale.
Por ajo gjithashtu përfshin mandate krejtësisht të reja, të tilla si e drejta për të transferuar të dhëna nga një ofrues shërbimi në tjetrin dhe e drejta për të kufizuar kompanitë nga përdorimi i të dhënave personale.
“Është një gjë graduale dhe jo revolucionare. Sidoqoftë për shumë kompani është një thirrje e madhe për zgjim pasi ata kurrë nuk i bënë detyrat e shtëpisë. Ata kurrë nuk e morën seriozisht direktivën e mbrojtjes së të dhënave “, tha Patrick Van Eecke, partner në firmën ligjore DLA Piper.
V.H/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.