Hyn në fuqi vendimi i qeverisë – Shtesa në pagë që do të përfitojnë anëtarët e institucioneve të Vettingut

Hyn në fuqi vendimi i qeverisë, miratuar së fundmi për pagesën shtesë që do të përfitojnë anëtarët e institucioneve të rivlerësimit të gjyqtarëve dhe prokurorëve. Konkretisht, vendimi i cili tashmë është botuar në “Fletoren Zyrtare” thekson se pagesa mujore shtesë përllogaritet në masën 50% mbi pagën bruto fillestare, për çdo anëtar të institucionit të rivlerësimit, sipas përkatësisë.

Vendimi u miratua të hënën nga qeveria, në mbështetje të nenit 100 të Kushtetutës, të neneve 29 dhe 69 të ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, të nenit 12, të ligjit nr. 96/2016, “Për statusin e gjyqtarëve dhe prokurorëve në Republikën e Shqipërisë”, me propozimin e ministrit të Drejtësisë dhe ministrit të Financave dhe Ekonomisë.

“Efektet financiare të këtij vendimi do të përballohen nga fondi rezervë i buxhetit të shtetit, i përcaktuar për institucionet e reja të sistemit të drejtësisë. Ngarkohen Ministria e Financave dhe Ekonomisë, Kolegji i Posaçëm i Apelimit, Komisioni i Pavarur i Kualifikimit dhe Komisionerët Publikë për zbatimin e këtij vendimi, i cili i shtrin efektet e tij nga data e emërimit të anëtarëve të institucioneve të rivlerësimit”.

os.de/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.