Ifo ul projeksionet për Gjermaninë – Parashikon krizë të dytë të euros nga Italia, vlerëson luftën tregtare
Instituti për hulumtime ekonomike në Gjermani, Ifo, uli projeksionet për ekonominë më të madhe të Europës këtë vit edhe tjetrin, duke përmendur nisjen e ngadaltë të këtij viti dhe rritjen e rreziqeve globale.
Ifo bëri të ditur se ekonomia gjermane do të rritet me 1.8% këtë vit dhe tjetrin, që përbën një ndryshim të madh të projeksioneve nga 2.6% dhe 2.1% që priste më parë.
Sipas institutit, vrulli ekonomik në Gjermani do të vazhdojë por me një ritëm më të ngadaltë, duke përsëritur vlerësimet e bëra nga Bundesbank.
Përveç aktivitetit të dobët industrial dhe rënies së eksporteve në 4 muajt e para të vitit, përplasja tregtare mes SHBA dhe Bashkimit Europian, po zbeh perspektivën për ekonominë gjermane.
Presidenti i SHBA, Donlad Trump po kërcënon vendosjen e tarifave në importet e makinave europiane, përveç barrierave për çelikun dhe aluminin.
Bundesbank bëri të ditur në nisje të kësaj jave se rritja ekonomike e Gjermanisë pritet të rimëkëmbet në tremujorin e dytë, falë shpenzimeve më të mëdha shtetërore, aktivitetit të ndërtimit dhe konsumit të fortë privat.
Megjithatë, paralajmëroi se shqetësimet politike dhe tregtare kanë zbehur perspektivën për ekonominë, gjë që solli uljen e projeksioneve.
Qeveria e re populiste në Itali, që ka dhënë premtime që bien ndesh me institucionet e BE, kanë shqetësuar gjithashtu kompanitë gjermane.
“Rreziqet janë shtuar për ekonominë gjermane. Avantazhet ekonomike janë minimizuar nga 2 rreziqe, kriza e dytë e eurozonës që do të vijë nga Italia dhe lufta tregtare”, deklaroi Ifo.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.