“Il Tirreno” për “kontrabandën” e të dhënave – “Tregu i zi është në Shqipëri, shitet 8 cent një numër”
E përditshmja italiane, “Il Tirreno”, ka bërë një investigim të zgjeruar mbi fenomenin e shit-blerjes së të dhënave, kryesisht numrave të telefonit.
Një pjesë e madhe e kompanive të marketingut, e sidomos kompanitë që operojnë në sektorin e Call Center funksionojnë mbi bazën e listave. Këto lista, që përmbajnë emrat e përdoruesve të një numri telefoni, adresën, kodin fiskal, atë postar si dhe numrat e identifikimit të kontratave të shërbimeve utilitare, si ujë, drita apo gaz, të cilat ligjërisht nuk mund të tregohen.
Në këtë mënyrë, kompanitë që shesin produkte ato shërbime të caktuara detyrohen t’i blejnë këto në tregun e zi, për një vlerë prej 8 cent një numër.
Prestigjiozja italiane ndërkohë pas investigimit të kryer arrin në përfundimin se, ky treg i zi për momentin është në Shqipëri. Pra, thënë shkurt, kompanitë italiane, po i blejnë listat me të dhëna të vetë italianëve nga shqiptarët.
Këta të fundit, në bazë të këtij investigimi janë në gjendje t`i mundësojnë kompanive italiane lista me deri 600 mijë numra telefoni. Në bazë të investigimit, këta numra janë të rregullt.
E gjithë biseda e gazetarëve të “Il Tirreno” me shitësin e të dhënave në Shqipëri bëhet nëpërmjet “Whatsapp”, ndërkohë që pagesa supozohet të bëhet nëpërmjet shërbimeve të transferimit të parave. Në pjesën dërrmuese, këto pagesa bëhen me këste.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.