Impakti i izolimit në ekonominë e rajonit – Shqipëria e ka vuajtur më pak se shumë vende përreth
Ekonomia shqiptare u tkurr me një normë prej 10.2% gjatë tremujorit të dytë të vitit, pra në periudhën prill-qershor, kur goditja si pasojë e masave bllokuese ishte edhe më e madhe. Kjo normë është treguesi më i rëndësishëm i impaktit të izolimit në ekonominë e vendit, sidomos në një kohë që e gjithë Europa po diskuton mundesinë e një mbyllje të dytë. Por si është kjo normë krahasuar me vendet e tjera të Ballkanit Perëndimor? Përgjigjen e gjejmë në një analizë të gjerë të Këshillit të Bashkëpunimit Rajonal (Rcc) , që mban edhe firmën e Majlinda Bregut, sekretare e përgjithshme e këshillit.
Sipas të dhënave të tremujorit të dytë të vitit, në rajon Shqipëria është e 4-ta për impaktin e bllokimit në ekonomi. Mali i Zi me një normë në rreth -20%, Maqedonia e Veriut, me -12.7% dhe Bosnje Hercegovina me -10.5% e kanë vuajtur më shumë se ne izolimin në ekonominë e tyre. Serbia dhe Kosova ndërkohë kanë pasur një kosto relativisht më të vogël, me -9.3% në rastin e Kosovës dhe -9.2% në rastin e Serbisë, thonë të dhënat. Ndër 6 vendet e rajonit, Shqipëria është i vetmi vend në recesion edhe në tremujorin e parë të vitit, rrjedhojë e drejtpërdrejtë e tërmetit të fuqishëm që goditi vendin më 26 nëntor të vitit të kaluar.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.