Impianti i plehrave në Verri – Kryemadhi: Protesta e 27 Janarit, edhe kundër mafies së plehrave
Në një dalje për mediat, kryetarja e LSI Monika Kryemadhi i bëri thirrje qytetarëve që t’i bashkohen protestës së 27 janarit. Sipas Kryemadhit kjo protestë është edhe kundër ndërtimit të impiantit të plehrave në Verri.
“Prej disa muajsh, një kompani e zotëruar nga militantë të Partisë Socialiste ka përfituar në mënyrë të dyshimtë 3 koncensione për të ndërtuar 3 impiante djegiesh. Në Fier ky impiant është refuzuar nga banorët, në Mbyet, edhe në Mbrostar, dhe së fundmi edhe në Veri. Banorët kanë të drejtë sepse ky projekt nuk ka lindur si nevojë e përpunimit të plehrave. Është e qartë se incineratori nuk na duhet në Qarkun e Fierit. Ajo që na duhet është një politikë e mirë për riciklimin dhe ndarjen në burim dhe për pastrimin e territorit. Incinerimi nuk ka vend në Shqipëri, përveçse kur kërkohen rast për të përpunuar plehrat që vijnë nga vendet e tjera të Bashkimit Europian”, tha Kryemadhi.
Banorët e kanë refuzuar edhe më herët ndërtimin e impiantit për djegien e plehrave, ndërkohë që në fushatën për zgjedhjet e 25 qershorit të vitit që lamë pas nga maxhoranca u është premtuar banorëve se ky impiant nuk do të ndërtohet.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.