Importet nga Rajoni Xinjiang – Britania do të “ndëshkojë” të gjitha bizneset që fshehin raportin tregtar

Qeveria britanike do të gjobisë kompanitë që fshehin marrëdhënien tregtare me rajonin Xinjiang në Kinë, ku ujgurët dhe pakicat e tjera myslimane dyshohet se janë subjekt i punës së detyruar, nën një sërë masash të reja.

Sekretari i Jashtëm i Mbretërisë së Bashkuar, Dominic Raab, njoftoi të martën masat e reja, të cilat Ministria e Jashtme thotë se janë krijuar për të siguruar që të gjitha organizatat britanike “nuk janë bashkëpunëtore, ose duke përfituar nga shkeljet e të drejtave të njeriut në Xinjiang”.

Qeveria e Mbretërisë së Bashkuar do të rishikojë gjithashtu se cilat produkte britanike mund të eksportohen në Xinjiang dhe do të lëshojë udhëzime të reja, duke përcaktuar rreziqet specifike me të cilat përballen kompanitë me lidhje me Xinjiang.

Departamenti i Shtetit në Shtetet e Bashkuara të Amerikës vlerëson se deri në dy milion ujgurë, si dhe anëtarë të grupeve të tjera të pakicave Myslimane janë arrestuar në një rrjet të gjerë të kampeve të internimit në Xinjiang.

Pekini ka mbrojtur prej kohësh goditjen në Xinjiang si të nevojshme për të luftuar ekstremizmin dhe terrorizmin dhe ka pohuar se objektet e tij janë “qendra trajnimi” vullnetare ku njerëzit mësojnë aftësitë profesionale, gjuhën kineze dhe ligjet.

“Provat e shkallës dhe ashpërsisë së shkeljeve të të drejtave të njeriut që po kryhen në Xinjiang kundër myslimanëve ujgurë janë tani shumë të arritshme”  u tha Raab anëtarëve të parlamentit.

Raab shtoi ndër të tjera se masat e reja kanë për qëllim “të dërgojnë një mesazh të qartë se këto shkelje të të drejtave të njeriut janë të papranueshme, dhe për të mbrojtur bizneset e Mbretërisë së Bashkuar dhe organet publike nga çdo përfshirje ose lidhje me to”.

Sekretari i Jashtëm i Mbretërisë së Bashkuar po bën gjithashtu thirrje që Kombet e Bashkuara të kenë qasje në rajonin e Xinjiang për të verifikuar akuzat për punë të detyruar dhe shkelje të tjera të të drejtave të njeriut.

Uashingtoni ka ndërmarrë hapat e tij për të kufizuar importet nga Xinjiang. Muajin e kaluar, administrata Trump njoftoi se do të bllokonte importet e pambukut nga atje – kufizimi i fundit në lidhje me rajonin.

Burimi origjinal: CNN

Përshtati në shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.