Imunizimi, larg targetit prej 80% – SHIFRAT ZYRTARE/ 2 doza i kanë marrë 32.4% e qytetarëve mbi 18 vjeç, 25% e popullsisë
Shqipëria është larg imunizimit të 80% të popullsisë, një target i vendosur nga vendet evropiane për ta konsideruar pandeminë e Covid-19 të vënë nën kontroll. Sipas të dhënave zyrtare nga Ministria e Shëndetësisë dhe Mbrojtjes Sociale, deri në datën 13 shtator rezultojnë të vaksinuar me të 2 dozat e vaksinës 704,626 qytetarë, të cilët përbëjnë 25% të popullsisë ne vend. Ndërkohë që, nëse do të konsiderojmë vetëm qytetarët mbi 18 vjeç, ku edhe është përqendruar vaksinimit në vendin tonë, atëherë rezulton se janë vaksinuar 32.4% e qytetarëve.
Ndërkaq, janë edhe 192 300 qytetarë , të cilët aktualisht kanë marrë vetëm një dozë të vaksinës, duke bërë që në total në vendin tonë të jenë injektuar 1,601,552 doza. Sikurse është bërë me dije edhe më herët, muaji Shtator është i hapur për vaksinimin, të gjithë qytetarët mbi 18 vjeç mund të paraqiten me kartën e identitetit në qendrën e tyre shëndetësore, në poliklinika ose në qendrën më të afërt të vaksinimit, çdo ditë, nga 08:00-20:00.
Ndërkohë që, për disa kategori Komiteti Teknik i Ekspertëve, i mbështetur nga qeveria ka vendosur paraqitjen e detyrueshme të certifikatës së vaksinimit për punonjësit e shëndetësisë, mësuesit, studentët dhe punonjësit e administratës publike. Ndërkohë që, në rast të mungesës së këtij dokumenti të punësuarit do të duhet të paraqesin periodikisht testin PCR negative, ndërsa studentët nuk mund të ndjekin leksionet në auditore. Paralelisht, institucionet shëndetësore apelojnë çdo ditë personat mbi 18 vjeç të kryejnë vaksinën anticovid, në një kohë që ka edhe vaksina në dispozicion. Deri tani kanë mbërritur në vendin tonë 1,982,130 vaksina antiCOVID.
NIVELI I VAKSINIMIT ME 2 DOZA
32.4% e qytetarëve mbi 18 vjeç
25% e popullsisë
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.