Inaugurohet “Air Albania”, Rama shpalos ambiciet: Liri për udhëtarët shqiptarë, zgjedhje e tyre e parë
Mbrëmjen e së premtes në pistën e aeroportit ndërkombëtar të Tiranës, u inaugurua linja ajrore që mbart flamurin shqiptar “Air Albania”. Në ceremoni morën pjesë figurat më të larta të qeverisë shqiptare, si dhe përfaqësues të qeverisë turke dhe kompanisë “Turkish Airlines”.
Në deklaratat e tyre, folësit nënvizuan rëndësinë që kjo linjë mbart për uljen e çmimeve të biletave në tregun e fluturimeve.
Kryeministri Edi Rama theksoi se nisja e kësaj kompanie me pjesëmarrje shtetin shqiptar si aksioner është një garanci për qëndrueshmërinë.
“Është një ëndërr që sot merr krahë për të filluar një fluturim që do të jetë i gjatë, jo i lehtë, por që synimi ynë dhe ambicia ime është ti çojë shqiptarët sa më larg dhe ndërkohë t’i ndërlidhë ata sa më shumë Më vjen mirë që Air Albania është një vepër kuqezi, një vepër kombëtare, fryt i arrirë në këtë që për ne është viti i Gjergj Kastriotit. Ideja për ta kthyer në vektorin e një lirie më të madhe për udhëtarët shqiptarë nëpërmjet një vëmendje të drejtpërdrejt dhe mundësie reale që ta kenë zgjedhjen e tyre të parë, është dhe mbetet ambicia jonë”, deklaroi Rama.
Rama u shpreh se tregu i fluturimeve në vend ka njohur vitet e fundit një rritje të vazhdueshme, megjithatë ajo kufizohet nga të pasurit e një aeroporti të vetëm ndërkombëtar, si dhe mungesa e destinacioneve të shumta.
“99% e këtyre fluturimeve mbulojnë vetëm distanca të shkurtra. Në shumicën dërrmuese madje nuk i tejkalojnë as 120 minuta. Ambicia jonë është që të shkojmë përtej kësaj”, u shpreh kryeministri.
Dy avionët e parë janë emërtuar sipas poetëve Lasgush Poradeci, i cili ndodhej sot në inaugurim dhe “Migjeni”, i cili do të vijë pas 1 muaji fluturimeve test në linjën Tiranë-Stamboll. Këta avionë do të fluturojnë drejt destinacioneve si Roma, Milano, Bolonja dhe Londra, ndërkohë që në të ardhmen pritet të shtohet edhe një fluturim transatlantik drejt SHBA me një avion të pagëzuar “Noli”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.