Inaugurohet fabrika e prodhimit të metaleve në Novoselë – Gjiknuri: Investimet po shtohen, interesi për Vlorën është rritur
Është inauguruar sot fabrika e prodhimit të metaleve në Novoselë. I pranishëm në inaugurimin e saj së bashku me krybashkiakun e Vlorës, Dritan Leli ka qenë edhe Ministri i Infrastrukturës dhe Energjisë, Damian Gjiknuri.
Ky investim i cili vjen si një bashkëpunim me sipërmarrës shqiptarë dhe italianë, kap shifrën 3.3 milion euro. Metalet të cilat do të prodhohen në këtë fabrikë do të shkojnë kryesisht për eksport.
“Ky është një investim i ri, modern, me teknologjinë më të fundit dhe që është për t’u përgëzuar. Investimet po shtohen, interesi për Vlorën është rritur”, tha ministri Gjiknuri.
Ndërkohë, Gjiknuri shtoi më tej se është njohur edhe me situatën dhe shqetësimet e zonës së Novoselës lidhur me qëndrueshmërinë e furnizimit me energji elektrike.
Duke i cilësuar edhe si ‘probleme të trashëguara ndër vite’, ai tha se zgjidhja e tyre do të bëhet shumë shpejt falë investimit që sapo ka nisur në Novoselë.
“Pak nga pak kjo zonë po kthehet në një zonë industriale. Investimi i ri i Operatorit të Shpërndarjes do të bëjë të mundur që energjia këtu të vijë pa ndërprerje dhe vitin tjetër do të planifikojmë edhe investim për ta kthyer këtë zonë në 20 kilovolt. Do të thotë që energjia do të jetë me parametrat më të mirë dhe që do të ndihmojë të gjitha bizneset e kësaj zone për të patur energji të pandërprerë.”
Ndërkohë, kryebashkiaku i Vlorë, Dritan Leli tha se ky investim ka punësuar disa prej banorëve të zonës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.