Inaugurohet pika kufitare  – Hani i Hotit, investim 2.5 milionë euro për shërbim më cilësor

Inaugurohet pika kufitare e Hanit të Hotit , një investim  prej 2.5 milion eurosh, që  pritet të ofrojë shërbim më cilësor ndaj qytetarëve, një lehtësim veprimesh të njerëzve dhe kryesisht të mallrave. Në ceremoni ishte i pranishëm edhe ministri i Brendshëm Fatmir Xhafaj i cili falenderoj asistencën e BE për këtë projekt duke shprehur bindjen se ky investim do të realizojë pritshmëritë për të pasur një menaxhim të kufirit shumë më cilësor se në të shkuarën, e tashmë të krahasueshëm me vendet e BE-së.

Xhafaj  bëri të ditur  se  së shpejti do të  nisin punimet për një ndërtesë të re për administratën në këtë Pikë të Kalimit Kufitar, për të cilën qeveria ka parashikuar një fond të posacëm

Projekti për pikën kufitare të Hani të Hotit, synon përmirësimin e infrastrukturës ndërkufitare ku përfshihet edhe terminali i ri doganor. Janë ndërtuar mbi 10 objekte të reja, dhe janë rinovuar ato ekzistuese. Në ceremoni morën pjesë edhe ambasadorja e BE Romana Vlahutin dhe ministri i brendshëm i malit të zi Mevludin Nuhodziç.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.