Administrata Amerikane e Sigurisë në Autostrada ka raportuar se në vitin 2009, 5 mijë e 474 persona humbën jetën në aksidente automobilistike, të shkaktuara nga shpërqendrimi i shoferëve. Ndërsa 448 mijë të tjerë u plagosën. Në Dhjetorin e kaluar kjo administratë publikoi një rekomandim me titullin, “jo telefonatë, jo mesazh, jo update”. Në dokument rekomandohet, që 50 shtetet amerikane të ndalojnë përdorimin e celularëve, madje edhe të atyre që nuk kërkojnë përdorimin e duarve gjatë kohës së drejtimit të një veture. Agjencia ka regjistruar rritje të ndjeshme të aksidenteve nga telefonatat. Në linjë me propozimet ka ardhë një program kompjuterik me emrin Securafone, që mund të përdoret në celularët e Android apo Apple. Ky program ndalon funksionimin e telefonit celular apo edhe pajisjeve të tjera si tablet në momentet kur vetuar lëviz me një shpejtësi përmbi 24 kilometra në orë. Softueri i instaluar në celular ka aftësinë që të vendosë edhe një limit për shpejtësinë e makinës në të cilën gjendet. Programi shkarkohet falas dhe abonimi kushton 9 dollarë në muaj. Reuters pyeti për opinion taksistët në New York dhe ata e cilësuan ide të shkëlqyer duke shtua se janë të shqetësuar për këmbësorët që lëvizin duke kryer telefonata ose duke bërë mesazhe. Ata thonë se duhet një program për të ndaluar shoferimin në gjendje të dehur. Përgatiti: Ermal Ngjelina

Teatri Kodak nuk do të ndriçohet më nga yjet e Hollivudit dhe nga statujat e arta të çmimeve Oscar. Eastman Kodak, aplikoi për faliment në muajin Janar dhe tani dokumentet tregojnë se kërkon një marrëveshje për të tërhequr emrin dhe të lirohet nga kontrata që nënshkroi në vitin 2000. Kompania e falimentuar e fotografisë, i kërkoi grupit që operon qendrën tregtare ku gjendet teatri, që ta lërë të lirë nga kontratat, ku Kodak paguan 4 milionë dollarë në vit për të pasur emrin në këtë teatër. Sipas dokumenteve të falimentit kontrata do kushtonte 75 milionë dollarë për 20 vitet e ardhshme. Ndërkohë akademia e shkencave të artit filmik i tha grupit ku ndodhet teatri se nuk do rinovojë kontratën pas përfundimit të ndarjes së çmimeve Oscar në 2013. sipas burimeve zyrtarët e Akademisë po shikojnë mundësinë të lëvizin zhvillimin e ceremonisë së çmimeve jashtë hollivudit, ndoshta në qendër të Los Angeles në teatrin e Nokia. Teatri Kodak kushtoi 94 milion dollarë për tu ndërtuar dhe përfundoi në vitin 2001. ai ishte dizenjuar për të qenë në funksion të organizimit të çmimeve Oscars. Gazetar: Ermal Ngjelina

Punonjësit e një kompania autobusësh në Melburn të Australisë u shokuan në fillim të javës, pasi panë çeqe pagese të papritura. Bosi i tyre kishte vendosur ti shpërblente për besnikërinë. Mediat australiane thanë se mesatarja e bonuseve ishte 8 mijë e 500 dollarë australianë dhe shuma reale ishte në varësi të kohës së shërbimit. Për pasojë, ka pasur nga ata punonjës që janë paguar me 30 mijë dollarë dhe të tjerë që kanë marrë 100 mijë dollarë. Ken Grenda, është shpallur nga mediat si bosi më zemërgjerë në Australi, pasi në total shpërndau 15 milionë dollarë australianë e barabartë me 16 milionë dollarë amerikanë. Shpërblimi u krye pasi ai shiti kompaninë, Grenda Transit, për afërsisht 400 milion dollarë. 79-vjeçari Grenda, tha për mediat se mori këtë vendim pasi në kompani kishte nga ata që kishin punuar për 40 apo edhe për 50 vite me radhë. Kompania u shit tek rivalja Ventura, e cila ka thënë se do mbajë në punë gjysmën e stafit aktual. Përgatiti: Ermal Ngjelina

Akademikët e Institutit për Studimin e Tërmeteve në Universitetin e Tokios, thonë se kryeqyteti i Japonisë ka 70% shanse të preket nga një tjetër tërmet më shumë se 7 ballë, në 4 vitet e ardhshme. Studimet e kryera nga qeveria thonë se një tërmet me këtë madhësi në Tokio do të shkatërrojë rreth 850 mijë ndërtesa. Të dhënat zyrtare thonë se kjo do të ndodhë në 4 vitet e ardhshme, ndërsa vlerësimet e tjera thonë se do ndodhë pas 30 vitesh. Vlerësimet e universitetit bazohen në rritjen e aktivitetit sizmik në këtë vit. Që nga 11 Marsi i vitit të kaluar, aktiviteti sizmik në kryeqytetin e Japonisë është rritur me 5 herë dhe zyrtarët po përgatiten. Në vitin e kaluar, pjesa veriore e Japonisë u godit nga një tërmet 9 ballë dhe zyrtarët po i referohen historisë për të parandaluar efektet negative. Në vitin 1498, një cunami pati dallgë 14 metra të larta. Në vitin 1923, u godit nga tërmeti 7.9 ballë. Ndërsa në vitin 1993 tërmeti 7.3 ballë goditi qyteti Kobe. Tashmë qytetarët kanë frikë nga përsëritja e historisë. Përgatiti: Ermal Ngjelina