India nuk është vatra e vetme! / Këto janë vendet me rritje rekord të rasteve me Covid së fundmi
India është aktualisht epiqendra e pandemisë në të gjithë botën, por nuk është i vetmi vend me rritje të madhe të infeksioneve me Covid-19. Nga Argjentina në Amerikën Latine e deri në Nepal, në Azi, shumë shtete të tjera kanë raportuar rritje rekord të rasteve në javët e fundit, sipas të dhënave të Universitetit John Hopkins Rritja e infeksioneve ka ardhur ndërkohë që progresi i vaksinimit ka qenë i pabarabartë në botë, me vendet e zhvilluara si SHBA dhe Britania, që janë shumë përpara vendeve të varfëra. Ndër vendet ku pandemia po godet rëndë së fundmi, është Argjentina, që ka patur rritje të rasteve nga poshtë 5,000 në nisje të Marsit, në mbi 39,000 në javën e kaluar. Kjo ka bërë që autoritetet të vendosin masa të reja të karantinës deri në fund të Majit. Argjentina mban një total të rasteve prej 3.5 milionë dhe mbi 74,000 vdekje, ndërkohë fushata e vaksinimit ka bërë progres të ngadaltë, me rreth 19% e popullsisë prej 45 milionë, që ka marrë të paktën 1 dozë të vaksinës. Në Azi, rritja e rasteve me Covid ka mbingarkuar sistemin e kujdesit shëndetësor në Nepal, me mungesa të shtretërve në spitale dhe furnizime me oksigjen. Rastet ditore në Nepal janë rritur nga poshtë 200 në nisje të Prillit, në një nivel rekord të lartë prej 9,300 në mes të muajit Maj, ndërkohë që autoritetet fajësojnë rikthimin e punëtorëve emigrantë nga vendi fqinj, India. Vendi ka një total prej mbio 513,000 rastesh, dhe mbi 6,300 vdekje, ndërkohë që vetëm 7.3% e popullsisë prej 29 milionë ka marrë të paktën një dozë. Një tjetër vend me rritje të rasteve, ka vënë në dyshim efektshmërinë e vaksinave, ndërkohë që ka imunizuar mbi 51% të popullsisë me të paktën 1 dozë. Bahreni ka regjistruar rritje të rasteve nga 600 në ditë në Mars, në mbi 2,000 në javën e kaluar. Vendi ka miratuar disa vaksina për përdorim, përfshirë Pfizer, vaksinën e Sinopharm dhe Sputnik, duke vënë nën dyshim efektshmërinë te 2 të fundit. Më larg drejt Lindjes, Tajvani ishte një ndër vendet me suksesin më të madh për të përmbajtur pandeminë, pa një karantinë kombëtare. Tajvani, me një popullsi prej 24 milionë, kishte vetëm 1,128 raste kryesisht të importuara, deri në fund të Prillit, por në javën e fundit, ka regjistruar mbi 600 raste në ditë.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.