India, përsëri mbi 400,000 raste / E treta herë për këtë javë. Vdekjet flitet se janë më të larta

Rastet e reja ditore të Covid-19 në Indi kanë kaluar 400,000 për të tretën herë këtë Javë, ndërkohë që vendi po has vështirësi për t’i bërë ballë valës së dytë shkatërruese.   Në 24 orët e fundit u regjistruan 414,188 raste, me 3,915 vdekje, sipas të dhënave të ministrisë së Shëndetësisë.  Megjithatë, raportimet e krematoriumeve dhe varrezave të mbingarkuara, si dhe të dhënat nga mediat lokale, tregojnë se shifrat zyrtare mund të nënvlerësojnë numrin e vërtetë të vdekjeve.  Numri total  i infeksioneve në Indi qëndron në 21.49 milionë, ndërsa vdekjet në 234,000. Në vetëm 7 ditë, India ka raportuar mbi 2.7 milionë raste  dhe mbi 25,700 vdekje, apo një mesatare të vdekjeve prej 153 njerëz në 1 orë.   Ndërkohë që qeveria indiane i ka rezistuar deri më tani thirrjeve për një tjetër karantinë kombëtare,  autoritetet shtetërore kanë shtuar kufizimet, përfshirë karantinat lokale.  Megjithatë, ekspertët mjekësorë janë shqetësuar se pandemia po përhapet tashmë në zonat rurale, ku jeton 70% e popullsisë indiane dhe infrastruktura shëndetësore nuk i përballon dot rastet e larta.   Vala e dytë në Indi nisi në Shkurt dhe infeksionet janë rritur në një normë alarmuese, nisur nga Prilli. Organizata Botërore e Shëndetësisë theksoi se rritja e larte e infeksioneve mund të jetë kryesisht prej versioneve të virusit që kanë pësuar mutacion. Një në çdo 3 raste të raportuara në botë, ndodhet në indi.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.