Industria e aluminit, përballë sfidave / Duhet të ulë ndotjen me 77% deri në 2050, për të arritur objektivat e klimës
Industria botërore e aluminit duhet të shkurtojë emetimet e gazrave serë me 77% deri në vitin 2050, për të arritur objektivat e ndryshimit klimatik, kryesisht duke u zhvendosur në energji elektrike të gjelbër, sipas Institutit Ndërkombëtar të Alumimit.
“Sfida për ne dhe për shumë sektorë është reduktimi i ndotjes, ndërkohë që duhet të rrisin prodhimin për t’i bërë ballë kërkesës”- tha Chris Bayliss, zv/sekretar i përgjithshëm i institutit. Rreth 60% e emetimeve nga sektori i aluminit janë nga energjia elektrike që përdoret për të shkrirë materialet, sipas një raporti të publikuar nga grupe të industrisë. Kërkesa për alumin pritet të rritet me 80% në rreth 180 milionë ton deri më 2050, pjesërisht prej nevojës nga sektorë të tjerë për të reduktuar ndotjen, si makinat elektrike.
Megjithatë, sektori i aluminit duhet të gjejë mënyra për të shkurtuar emetimet e dioksidit të karbonit nga nivelet aktuale prej 1.1 miliardë ton, në 250 milionë ton deri në vitin 2050, sipas institutit. Nëse asgjë nuk ndodh, ndotja pritet të rritet në 1.6 miliardë ton CO2 deri më atëherë. Sasi të mëdha të emetimeve vijnë nga Kina, që është edhe prodhuesi më i madh në botë i aluminit dhe përdoruesi më i madh i qymyrit për të gjeneruar energji. Megjithatë, instituti bëri të ditur se edhe prodhuesit e të ashtuquajturit “alumin të gjelbër” me energji hidrike, duhet të reduktojnë gjithashtu ndotjen.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.