Industria e kamionëve cakton datën për karvanët me kamiona në rrugët e Europës

Prodhuesit kamionëve njoftuan të martën se deri në vitin 2025 do të prezantohen në autostradat e Europës karvanë me kamionë gjysmë të automatizuar, ndërsa do të jenë të gatshëm në treg që në vitin 2023. Gjatë kësaj kohe, politikëbërësit dhe autoritetet në vendet që ndikohen duhet të kenë nxjerrë rregullat dhe të kenë bërë ndryshimet e nevojshme për të mbështetur togat e kamionëve që kalojnë kufijtë.

Kamionët do të funksionojnë si një ekip në vargje me dy ose më tepër automjete, duke përdorur teknologjinë më të fundit ndërlidhëse me sisteme që mbështesin drejtimin e mjeteve. Kamioni në krye do të shërbejë si lideri i grupit dhe mjetet pas tij do të reagojnë dhe përshtaten me ndryshimet në lëvizjet e tij, duke mos kërkuar asnjë veprim nga ana e shoferëve.

Testimet në terren për këtë mënyrë transporti janë duke u zhvilluar. Ky grupim i lejon kamionët të lëvizin më pranë njëri-tjetrit, duke ulur fërkimin e ajrit, që përkthehet në më pak karburant të përdorur dhe lëshime CO2 deri në 16% më pak.

Në këtë sistem edhe frenimi është automatik dhe i menjëhershëm dhe kërkon 1/5 e kohës që një njeri ka nevojë për të reaguar.

Grupimi i kamionëve thjeshtëzon transportin dhe rrit shpejtësinë e dërgesave, si edhe i lejon shoferët të bëjnë edhe detyra të tjera, apo të pushojnë, duke ulur njëkohësisht edhe kostot për kompanitë e transportit.

Duke nisur nga viti i ardhshëm këto kompani do të punojnë për të krijuar një teknologji e cila është po aq eficiente edhe për kamionët e markave të ndryshme, pasi brenda një kompanie grupimi është vërtetuar të ketë sukses.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.