Industria e verës “dorëzohet” para pandemisë – Si është ndarë tregu/ Konsumi mbetet i ulët, vetëm 1.34 litra në vit për frymë
Prodhuesit formalë të verës po përjetojnë vështirësi sa i takon aksesit në treg. Sipas një stduimi të hartuar nga Ministria e Bujqësisë dhe GIZ, kjo ndodh për disa arsye, ku përfshihet konkurrenca e pandershme nga kantinat joformale; konkurrenca e pandershme nga verërat e importuara; si dhe rënie e kërkesës për shkak të pandemisë Covid-19. Nga intervistat e bëra me përpunues të verës, raportohet një rënie drastike e shitjeve për tre arsyet e mësipërme, ku dy të parat kanë ndikuar në aksesin në treg prej disa vitesh tashmë dhe e treta ka sjellë demë të mëdha për kompanitë së fundmi.
Megjithatë në raport citohet se ekziston një prirje e rritjes së kërkesës për verë (pasi konsumatorët kalojnë në një mënyrë jetese më të shëndetshme – dhe për rrjedhojë kalojnë nga konsumi i rakisë në verë), dhe një tendencë në zhvillim e rritjes së kërkesës për verë të cilësisë së lartë. Intervistat me përpunuesit e verës informojnë se ekspertët e huaj preferojnë verën e mirë vendase dhe madje edhe konsumatorët vendas janë kthyer drejt verës së cilësisë së mirë.
Por përpos kësaj, konsumi i verës në Shqipëri për frymë në vit për personat mbi 15 vjeç në vitin 2019 ishte 1.34 litra, duke bërë që vendi ynë të mbetet prapa të gjitha vendeve të Ballkanit Perëndimor, me përjashtim të Bosnjës dhe Hercegovinës në këtë drejtim. Industria e përpunimit të verës në Shqipëri përbëhet nga 61 kantina vere (MARD, 2020). Raportohet se ka edhe rreth 80 prodhues të vegjël të verës, shumica prej tyre informale . Kjo industri është e përqendruar më shumë në Durrës, Berat, Elbasan, Vlorë, Tiranë dhe Shkodër. Këto gjashtë rajone përbëjnë afërsisht ¾ e (73%) të njësive të përpunimit të alkoolit/verës.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.