Industria gjermane në “formë” – Porositë për mallrat “Made in Germany”, në rritje të vazhdueshme

Porositë industriale në Gjermani janë rritur papritmas gjatë Tetorit, falë kërkesës së fortë brenda vendit dhe jashtë Eurozonës.

Të dhënat tregojnë se sektori industrial do të rifitojë vrull në muajt që vijnë, duke kontribuar në rritjen e ekonomisë më të madhe të Europës.

Kontratat për mallrat “Made in Germany”, u rritën me 0.5% në Tetor me bazë mujore, duke treguar gjithashtu rritje për 3 muaj radhazi.

Analistët prisnin një reduktim të këtij vrulli, pas rritjes me 1.2% në Shtator.

Ekonomia gjermane ka treguar rritje që prej vitit 2010 dhe ka fituar vrull në tremujorin e tretë, por ekzistojnë shqetësime në lidhje me përpjekjet për formimin e qeverisë, 2 muaj pas zgjedhjeve kombëtare.

Megjithatë,  Ministria e Ekonomisë deklaroi se numri i madh i porosive, bashkuar me besimin tejet optimist të bizneseve, tregojnë se sektori nuk do të ndikohet nga pasiguritë politike.

Kërkesa nga jashtë tregoi rritje me 0.5%, kryesisht nga vendet jashtë Eurozons, ndërsa kontratat brenda vendit u rritën me 0.4%.

Kërkesa për mallra kapitale dhe konsumatore u rrit në Tetor, ndërsa për mallra të ndërmjetëm u tërhoq lehtë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.