Industria minerare gjatë pandemisë – AKBN: Në 2020-ën nuk punuan fare 37.4% e subjekteve, 1% më pak se një vit më parë

217 subjekte apo 37.4% e atyre që disponojnë leje minerare nuk ushtruan aktivitet gjatë vitit 2020. Të dhënat bëhen me dije nga Agjencia Kombëtare e Burimeve Natyrore, ndërkohë që edhe pse industria minerare konsiderohet si një nga më të godituarat nga pandemia e shkaktuar nga COVID-19, të paktën ushtrimi i aktivitetit në vendin tonë duket se nuk ka shumë ndryshime në raport me vitin 2019, që ishte një vit normal.

Sipas të dhënave nga AKBN, gjatë vitit 2019, ishin 38.4% e subjekteve minerare, që nuk punuan fare, apo 1% më shumë se viti pandemik. Ndërkaq, pavarësisht krizës një numër i konsiderushëm subjektesh investuan një vlerë totale prej 2.24 mld lekë apo 21.9 mln USD gjatë vitit 2020. Subjektet minerare me kapital të huaj kanë investuar 789.9 mln lekë apo 7.74 mln USD. Ndërkohë që vlera e investimeve nga ana e kompanive me kapital shqiptar është edhe më e madhe, duke u regjistruar në 1.45 mld lekë apo 14.2 mln USD.

Investimet më më mëdha regjistrohen në drejtim të mineralit të kromit, duke u fiksuar në 1.19 mld lekë, ndërsa pas këtij minerali vjen bakri me 486 mln lekë, si dhe bitumi dhe zhavori bituminoz me 155.2 mln lekë. Viti që lamë pas është konsideruar i vështirë për sektorin e mineraleve, për shkak të situatës së krijuar nga COVID-19, që u pasua me rënien e kërkesës dhe rënien e çmimit të mineraleve në tregjet ndërkombëtare.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.