Inflacioni “mbyt” familjarët në Britani – Çmimet e larta zerojnë rritjen e pagave
Inflacioni i lartë në Britani ka bërë që të zhduket thuajse tërësisht rritja e pagave në Mbretëri gjatë tre muajve të parë të këtij viti.
Kjo është shenja më e qartë se, familjarët tashmë kanë filluar ta ndiejnë rritjen e çmimeve në xhepat e tyre, në një kohë që filluan edhe negociatat për Brexit.
Të ardhurat e punonjësve u rritën me 2.3% në terma vjetorë gjatë tre muajve të parë të vitit, në nivel të pandryshuar në krahasim me tremujorin paraardhës. Gjatë Marsit ndërkohë, norma e inflacionit u ngjit po në 2.3%.
Gjithsesi, duke i zhveshur normën e rritjes së çmimeve gjatë tre muajve të parë, rezulton se, pagat realisht u rritën me vetëm 0.2%. Po ti heqim edhe bonuset, norma zbret në 0.1%.
Ky është rezultati më i dobët që prej vitit 2014 dhe tregon se, ekonomia britanike po futet në një cikël aspak të lehtë. Pavarësisht se, situata po përkeqësohet, indikatorë të tjerë do të luajnë rolin e peshores.
Norma e papunësisë vijon të mbetet pranë niveleve rekord minimale. Gjithsesi, inflacioni mbetet shqetësimi kryesor, dhe ekspertët projektojnë se këtë vit do ta tejkalojë normën e 3%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.