Inflacioni në Britani – Rritet me 2.7% për muajin Prill, niveli më i lartë në 4 vite
Inflacioni në Britani është rritur në nivelin më të lartë në 4 vite gjatë muaji Prill, tregojnë të dhënat zyrtare, duke vënë në dukje tkurrjen e fuqisë blerëse të ekonomive familjare përpara zgjedhjeve më datë 8 Qershor.
Indeksi i çmimeve të konsumit u rrit me 2.7% në muajin Prill krahasuar me të njëjtën periudhë një vit më parë, raporton Zyra Kombëtare e Statistikave, duke thyer pritshmëritë e analistëve për një rritje me 2.6%.
Inflacioni është përshpejtuar në Britani në muajt e fundit, nxitur nga zhvlerësimi i paundit që erdhi si pasojë e daljes nga Bashkimi Europian dhe rritja e çmimeve të naftës që është reflektuar në vende të tjera gjithashtu. Javën e kaluar Guvernatori i Bankës së Anglisë, Mark Carney, paralajmëroi se ky vit do të jetë i vështirë për konsumatorët, duke shtuar se pagat në terma realë, do të bien.
Megjithatë, në takimin e javës së kaluar, Banka mbajti normën bazë të interesit të pandryshuar. Inflacioni në Prill u nxit nga rritja e çmimeve të udhëtimeve ajrore, rritja e çmimit të veshjeve dhe tarifat për energjinë elektrike.
Shumë ekonomistë thonë se ndikimi i rënies së sterlinës te niveli i çmimeve do të ndihet më shumë në muajt që vijnë, ndërkohë që Banka e Anglisë pret që inflacioni të arrijë 3% deri në fund të vitit.
Duke hequr çmimet e luhatura të naftës dhe komponentëve ushqimorë, indeksi bazë i çmimeve të konsumit u rrit me 2.4%, norma më e lartë që prej Marsit 2013. Çmimet e shërbimeve u rritën me 3%, niveli më i lartë që prej Shtatorit 2013, ndikuar nga çmimet më të larta të udhëtimeve ajrore.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.