Inflacioni në Eurozonë, rekord 13 vjeçar! – Në 4.1%, më shumë se 2-fishi i objektivit të BQE. Kontribuon energjia

Inflacioni në Eurozonë kaloi pritshmëritë për muajin Tetor dhe preku nivelin më të lartë në 13 vite, duke shtuar presionet tek Banka Qendrore Europiane, që e ka nënvlerësuar vazhdimisht rritjen e çmimeve të konsumit në vitin e kaluar.  Inflacioni në 19 vendet që ndajnë euron u rrit në 4.1% në Tetor, nga 3.4% një muaj më parë dhe sipër projeksioneve prej 3.7%.  Shifra u nxit nga çmimet më të larta të energjisë, rritja e taksave dhe rritja e presioneve në çmime nga “ngërçet” në ofertë, që po pengojnë prodhimin industrial, kryesisht prodhimin e makinave, sipas të dhënave nga Eurostat.

Treguesi është më i lartë që prej Korrikut 2008 dhe rritja më e shpejtë që kur nisi publikimi i të dhënave seri në vitin 1997.  Vetëm çmimet e energjisë u rritën me 23% me bazë vjetore, duke dhënë kontributin më të madh tek inflacioni.  Shërbimet, që kanë patur rritje anemike ndër vite, u rritën me 2.1%.   Treguesi përfundimtar në 4.1% është tashmë 2 herë më i madh se objektivi i BQE dhe pritet të marrë vrull mëtej, përpara se të tërhiqet ngadalë në vitin e ardhshëm, kur disa faktorë të njëhershëm të lagohen.

Megjithatë, të gjithë treguesit sinjalizojnë se inflacioni do bjerë në mënyrë më të ngadaltë se mendonin politikëbërësit, duke rritur rrezikun që çmimet e larta, edhe pse të përkohëshme, mund të penetrojnë tek pagat dhe strukturat e vendosjes së çmimit nga korporatat. Presidentja e institucionit në Frankfurt, Christine Lagarde, foli me një ton më të kujdesur për inflacionin këtë javë, duke paralajmëruar se ndërprerjet në ofertë do zgjasin mëshumë se sa pritej, duke mbajtur dhe çmimet të larta për më gjatë dhe vendosur presione tek pagat.  Duke shtuar shqetësimet për inflacionin, një sondazh i BQE tregoi se mbi 30% e kompanive të anketuara presin probleme me furnizimet dhe kosto më të mëdha të inputit për 1 vit tjetër apo më gjatë.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.