Inflacioni në Eurozonë – Shënon 1.5% në muajin Shtator, larg objektivit të BQE
Inflacioni në Eurozonë rezultoi poshtë projeksioneve për Shtatorin, tregojnë të dhënat e Eurostat, duke mbështetur komentet e Bankës Qendrore Europiane për një heqje graduale të stimujve monetarë.
Inflacioni në 19 vendet që ndajnë euron, mbeti i pandryshuar në 1.5% këtë muaj, poshtë projeksioneve prej 1.6% dhe gjithashtu poshtë objektivit të Bankës Qendrore në Frankfurt prej rreth 2%.
Ndërkohë që inflacioni po tregon tendencë për rënie në muajt që vijnë, Banka Qendrore Europiane ndodhet në një pozitë të vështirë, për shkak se rritja e fortë ekonomike garanton tkurrjen monetare ndërsa çmimet e ulëta të konsumit tregojnë për vazhdim të stimujve.
Kompromisi që ka gjasa të arrihet së shpejti mund të jetë për një reduktim të vogël të blerjes së obligacioneve duke nisur nga viti që vjen. Në Tetor, institucioni në Frankfurt pritet të vendosë për poitikat monetare.
Inflacioni bazë, i pandryshuar në 1.3%, përbën gjithashtu shqetësim për politikëbërësit. Banka Qendrore Europiane pret që inflacioni të bie në 0.8% në vitin që vjen, përpara së të arrijë 1.4% më vonë gjatë 2018-ës.
Problem për bankën është se ndërsa vendet e eurozonës kanë krijuar mbi 7 milionë vende pune që prej ditëve më të këqija të krizës financiare, rritja e pagave nuk është përshpejtuar. Rritja e euros kundër dollarit me 12% mund të mbajë gjithashtu çmimet e limituara, kryesisht prej mallrave industriale të importit.
Banka nuk e ka arritur objektivin për inflacionin në thuajse 5 vite dhe pret që ta humbasë deri në fundin e kësaj dekade. Duke parë komponentët, energjia ka patur rritjen më të madhe në muajin Shtator, ndjekur nga grupi “ushqime, alkool dhe duhan” me 1.9% dhe shërbimet me 1.5%.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.