Inflacioni në Mbretërinë e Bashkuar – Qëndron në 3% në Janar, rrit shanset e ndërhyrjes nga Banka e Anglisë
Inflacioni në Mbretërinë e Bashkuar qëndroi në nivelin më të lartë në 6 vite gjatë Janarit, duke vënë në dukje sfidat e Bankës së Anglisë, për të rikthyer rritjen e çmimeve brenda objektivit në 2 vitet e ardhshme. Zyra e Statistikave në Britani raportoi se Indeksi i çmimeve të konsumit qëndroi në një normë vjetore prej 3% gjatë Janarit, i pandryshuar nga Dhjetori, pas rritjes në 3.1% në muajin Nëntor. Rezultati i Janarit ishte sipër projeksioneve të analistëve për një ngadalësim në 2.9%.
Banka e Anglisë surprizoi tregjet financiarë javën e kaluar, ku deklaroi se kërkon ta ulë inflacionin në nivelin objektiv më herët se ç ‘priste. Guvernatori Mark Carney dhe kolegët e tij në Komisionin e Politikave Monetare, bënë të ditur se norma bazë e interesit mund të rritet më shpejtë se sa vlerësonin më parë. Kjo fjali bëri që tregjet të rrisin shanset në 70% për një ndërhyrje me 25 pikë bazë në muajin Maj dhe me 50% për një rritje tjetër deri në fund të vitit, që do ta çonte normën bazë të interesit në 1%.
Shqetësimet mbi nivelin e çmimeve janë shfaqur që prej referendumit në Qershor 2016, ku rënia e madhe e paundit rriti kostot e importit. Një kombinim i inflacionit të lartë me rritjen e ngadaltë të pagave si dhe pasiguritë në lidhje me kushtet e daljes nga BE në 2019-ën, pritet të ndikojnë në ngadalësimin e ekonomisë britanike këtë vit. Zyra e Statistikave tregoi se ekzistojnë faktorë që pritet të ngadalësojnë nivelin e çmimeve, kryesisht rritja e ngadaltë e kostos së energjisë.
Te firmat prodhuese, kosto e lëndëve të para, ku shumica janë të importuara, pati rritje me 4.7% me bazë vjetore gjatë Janarit, në rënie nga 5.4% në Dhjetor. Prodhuesit kanë rritur çmimet me 2.8% krahasuar me një rritje prej 3.3% në Dhjetor. Të dhëna të tjera treguan se çmimet e shtëpive gjatë Dhjetorit u rritën me 5.2% në Mbretërinë e Bashkuar, sipër normës prej 5% në Nëntor, ndërsa vetëm në Londër, çmimet u rritën me 2.5%.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.