Inflacioni ngjitet në 1.2% në mars – Çmimet e ushqimeve dhe pijeve jo-alkoolike në rritje me 3.1% krahasuar me marsin 2020

Norma e inflacionit në muajin Mars është ngjitur në 1.2%, nga 1.1% që ishte muajin paraardhës, tregojnë të dhënat më të fundit nga Instituti i Statistikave. Një vit më parë, kjo normë fiksohej në 2.1%, ndërkohë që krahasuar me shkurtin e këtij viti, rritja fiksohet në masën 0.7%. Sa i përket ndikimit të grupeve në normën e inflacionit, kontributin kryesor e ka dhënë grupimi i “ushqimeve dhe pijeve jo-alkoolike”, me 0.96 pikë përqindje. Çmimet e ushqimeve dhe pijeve jo-alkoolike rezultojnë të jenë 3.1% më të larta se e njëjta periudhë e një viti më parë.

Ky grupim është ai me rritjen më të madhe të çmimeve në terma vjetor, tregojnë shifrat zyrtare. Më pas vjen komunikimi, ku çmimet rezultojnë të jenë 2.2% më të shtrenjta, së bashku me “mobilje, pajisje dhe mirëmbajtje shtëpie”, me po 2.2% rritje krahasuar me të njëjtën periudhë të një viti më parë. Transporti është i vetmi grupim ku çmimet në mars të këtij viti kanë qenë më të ulta se marsi i një viti më parë, në rënie me 1.6%. Kjo e dhënë tregon se ky sektor vijon të vuajë krizën e rendë të shkaktuar nga pandemia.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.