Informacioni i klasifikuar, Qeveria ndryshon ligjin – Certifikatat të lëshohen në bazë të besnikërisë, besueshmërisë dhe sigurisë së personave

Vetëm pak ditë përpara publikimit të pagave të mbi 630 mijë qytetarëve shqiptarë, Qeveria ka hedhur për konsultim public ligjin e ri për “Informacionin e Klasifikuar”, qëllimi I të cilit është është mbrojtja e këtyre të dhënave nga humbja, dëmtimi, rrjedhja, kompromentimi dhe/ose ekspozimi i paautorizuar.

Në relacionin shoqërues, Qeveria shpjegon se Inicimi i këtij projektligji lidhet me nevojën për të përditësuar kuadrin ligjor për informacionin e klasifikuar, si dhe për të harmonizuar e përshtatur sa më mirë kuadrin ligjor për disiplinat e informacionit të klasifikuar me standardet e vendeve të BE-së dhe të NATO-s.

Projektligji përcakton 5 disiplina për mbrojtjen e informacionit të klasifikuar janë: a. Siguria e informacionit; b.  Siguria e personelit; c. Siguria fizike; ç. Siguria e sistemeve të komunikimit dhe informacionit; si dhe  d.Projekte të klasifikuara dhe siguria industriale.

Një prej krerëve kryesorë të draftit, trajton disiplinën e “Sigurisë së personelit” e cila është tërësia e masave dhe e procedurave, mbi bazën e të cilave vlerësohet nëse një person duke iu referuar besnikërisë, besueshmërisë dhe sigurisë së tij, mund të autorizohet për të patur akses tek informacioni i klasifikuar, pa e rrezikuar sigurinë e këtij informacioni.

Është përfshirë për herë të parë në projektligj Koncepti “after caring”. Me të nënkuptohet, procesi i verifikimit të sigurisë, i cili vijon edhe pas pajisjes së aplikantit me Certifikatë të Sigurimit të Personelit. Pajisja me CSP nuk duhet të konsiderohet si hapi përfundimtar në procesin e vlerësimit të sigurisë së një aplikanti. Kjo përfshin vlerësim të vazhdueshëm sigurie për çdo ndryshim në sjelljen e individit apo të çdo implikimi në aktivitete të kundërligjshme. Ky parashikim përcaktohet në nenin 27 të projektaktit.

Ndërkohë që kapituj të tjerë të rëndësishëm i dedikohen sistemeve të mbrojtjes fizike dhe të teknologjisë së informacionit.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.