Infrastruktura shëndetësore – Manastirliu: Rindërtohen 80 qendra gjatë vitit 2018

Ndërtohet qendër e re shëndetësore në Maminas, e cila do të ofrojë kujdesin parësor për banorët e zonës. Ministrja e Shëndetësisë dhe e Mbrojtjes Sociale Ogerta Manastirliu ka vizituar nga afër këtë qendër, ku është shprehur se ka nisur puna për ndërtimin e 80 qendrave në të gjithë vendin. Ndërkohë që  vetëm në qarkun e Durrësit do të rehabilitohen 6 qendra shëndetësore këtë vit.

 “Vetëm në qarkun e Durrësit rehabilitohen 6 qendra shëndetësore këtë vit, në kuadër të programit kombëtar për rindërtimin e 300 qendrave shëndetësore në 4 vite, 80 prej të cilave rindërtohen këtë vit. Në qarkun e Durrësit këtë vit rikonstruktohen Qendra Shëndetësore nr 5, qendra shëndetësore nr 6 në plazh, pika e ambulancës në Porto-Romano, pika e ambulancës në Shetaj (Ishëm), qendra shëndetësore Shënavlash (Rrashbull) dhe qendra shëndetësore Derede në Krujë.”

Sipas Ministres së Shëndetësisë  rindërtimi i 80 qendrave shëndetësore në të gjithë vendin do të përfundojë deri në fund të vitit 2018.

Enetela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.