Injektim rekord likuiditeti në T3 – Ndërhyrjet e BSH, edhe më shumë se T2, arrijnë në 40.5 miliard lekë në ditë
Ndërhyrjet e Bankës së Shqipërisë në tregun e parasë prekën shifër rekord gjatë tremujorit të tretë të këtij viti, duke tejkaluar madje edhe nivelet e tremujorit të dytë të vitit, kur pandemia ishte në kulmin e saj. “Injektimi mesatar ditor nëpërmjet operacioneve injektuese të likuiditetit me maturim 1-13 javë, është rritur më tej gjatë periudhës , në 40.05 mld lekë, kundrejt përkatësisht 33.63 mld lekë dhe 27.34mld lekë në dy 3-mujorët e mëparshëm dhe 31.26 mld lekë në 3-mujorin e tretë të vitit 2019″, nënvizon Banka e Shqipërisë.
Kërkesa e bankave për likuiditet në operacionet e Bankës së Shqipërisë ka qenë vetëm në javën e dytë të muajit korrik, nën 36 mld lekë, dhe ka arritur nivelin maksimal 46 mld lekë në 2 raste, në muajt korrik dhe gusht”-vijon më tej institucioni. Në fund të periudhës, kërkesa e bankave për likuiditet ka qenë rreth mesatares së periudhës, pranë 40 mld lekëve.
“Rritja e parasë në qarkullim ka qenë faktori kryesor që ka nxitur rritje të mungesës së likuiditetit, ndërkohë që, rritja e marrëveshjeve SWAP me Ministrinë e Financave dhe Ekonomisë ka kontribuar në zbutjen e këtij efekti”-sqaron Banka e Shqipërisë. Sa i përket portofolit të bankës, institucioni nënvizon se: “Gjatë3-mujorit të tretë të vitit 2020, portofoli i Bankës së Shqipërisë ka rënë me vetëm 50 mln lekë, pasi është rritur me përkatësisht 6.90 mld lekë dhe me 2.40 mld lekë në 3-mujorët e mëparshëm. Banka e Shqipërisë ka synuar mbajtjen e portofolit në nivele të pandryshuara në pritje të rënies së mungesës së likuiditetit në pjesën e dytë të vitit”.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.