Instagram tani do t’u tregojë përdoruesve se kur duhet të shkëputen nga aplikacioni!

Vetëm një ditë para se kreu i Instagram të përballet me pyetje nga ligjvënësit mbi praktikat e saj të sigurisë së fëmijëve, kompania po nxjerr një sërë veçorish të reja që synojnë ta bëjnë më të vështirë për përdoruesit, veçanërisht adoleshentët, të bien e pre e rreziqeve në rrjet që mund të jenë të dëmshme për shëndetin e tyre mendor.

Të martën, kompania lançoi mjetin e saj Take a Break, i cili do t’i inkurajojë përdoruesit të kalojnë pak kohë larg platformës pasi të kenë lëvizur për një periudhë të caktuar. Funksioni, i shpallur në shtator, do të vijë fillimisht për përdoruesit në Shtetet e Bashkuara, Mbretërinë e Bashkuar, Kanada dhe Australi, dhe për të gjithë përdoruesit në muajt në vijim.

Përdoruesit mund ta aktivizojnë veçorinë te “Cilësimet” dhe të zgjedhin nëse duan të sinjalizohen pas përdorimit të platformës për 10 minuta, 20 minuta ose 30 minuta. Më pas ata do të marrin një sinjalizim në ekranin e plotë që u thotë të mbyllin aplikacionin, duke u sugjeruar të marrin frymë thellë, të shkruajnë diçka, të kontrollojnë një listë detyrash ose të dëgjojnë një këngë.

Vaishnavi J, kreu i sigurisë dhe mirëqenies në Instagram, tha se funksioni është ende në fazat e hershme dhe do të zgjerojë funksionalitetin e tij në 2022.

Instagram tha gjithashtu se do të marrë një “qasje më të rreptë” ndaj përmbajtjes që u rekomandon adoleshentëve dhe do t’i shtyjë ata në mënyrë aktive drejt temave të ndryshme nëse ata janë duke u ndalur në diçka – çdo lloj përmbajtjeje – për një kohë të gjatë. Ndërsa kompania tha se do të ndajë më shumë rreth funksionit së shpejti, tema të tilla si destinacionet e udhëtimit, arkitektura dhe fotografia e natyrës do të përdoren për të devijuar vëmendjen. Funksioni do të nisë vitin e ardhshëm.

Veçoritë bazohen në mjetet ekzistuese të menaxhimit të kohës në Instagram, si ai që i lejon njerëzit të dinë se kur kanë arritur sasinë totale të kohës që duan të kalojnë në Instagram çdo ditë. Kompania tha se po teston gjithashtu një mënyrë të re që njerëzit të menaxhojnë aktivitetin e tyre në Instagram në një vend, duke i lejuar ata të fshijnë në masë fotot dhe videot që kanë postuar, si dhe pëlqimet dhe komentet e mëparshme. CNN

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.