Institucionet, 52.2 milionë euro borxhe – “Fluturon” fatura për gjyqet e të larguarve nga puna
Në tre muajt e parë të viti, institucionet publike kanë krijuar 1.4 miliardë lekë apo 11.3 milionë euro detyrime të prapambetura ndaj bizneseve dhe individëve, duke e çuar faturën totale të borxhit ku përfshihen edhe detyrimet stok në rreth 6.5 miliardë lekë apo 52.2 milion euro deri në fund të Marsit 2020.
Shqetësues është fakti se nga fatura e përgjithshme e borxhit, 4 miliardë lekë janë vendime gjyqësore që buxheti i shtetit duhet të paguajë në favor të palëve fituese për ish punonjës të larguar nga puna apo për dëmshpërblime për prishje objektesh nga ana e Inspektoratit Kombëtar i Mbrojtjes së Territorit.
Të dhënat zyrtare të Ministrisë së Financave për periudhën Janar-Mars 2020, tregojnë se peshën më të madhe të detyrimeve totale e mban Ministria e Infrastrukturës me afro 1.7 miliardë lekë, e ndjekur nga ministria e Brendshme me 1.2 miliardë lekë dhe ajo e Drejtësisë me 1.1 miliardë lekë. Ndërsa sa i takon detyrimeve të krijuara rishtazi, vlerën më të lartë e zë Drejtoria e Përgjithshme e Tatimeve e cila ka ka akumuluar 648.3 milion lekë detyrime të reja vetëm në tre muajt e parë të vitit për vendime gjyqësore lidhur me rimbursimin e TVSH, ndërsa në total arrin shifrën e 728 milionë lekëve duke përfshirë edhe të prapambeturat.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.