Institucionet “injorojnë” KPP-në për tenderët – Nuk pezullojnë procedurat kur ka ankesa nga bizneset, APP: S’do iu njohim fituesin

Autoritetet kontraktore nuk iu binden vendimeve të Komisionit të Prokurimit Publik, duke shkelur procedurat e duke vijuar me procedurat tenderuese, ndonëse operatorë të ndryshëm ekonomikë paraqesin ankesa për dokumentet e tenderit, çka duhet të pasohet me pezullim të procedurës. Duke marrë shkas nga këto problematika të konstatuara, Agjencia e Prokurimit Publik dhe Komisioni i Prokurimit Publik ka hartuar një rekomandim, ku iu kërkon autoriteteve kontraktore zbatimin e vendimeve të KPP-së në rastet e ankesave për modifikimin e  dokumenteve të procedurës së prokurimit.

Më konkretisht, këto institucione kërkojnë pezullimin e menjëhershëm të procedurave, sikurse parashikon legjislacioni në fuqi nëse janë paraqitur ankesa nga biznese të ndryshëm. Gjithashtu, autoritetet kontraktore duhet të reflektojë të gjitha ndryshimet që kërkohen në vendimet e KPP-së, ndërkohë që heqja e pezullimit të procedurës duhet të bëhet vetëm pasi e autorizon Komisioni i Prokurimit Publik.

Paralelisht, APP iu bën me dije institucioneve se në çdo rast nuk do të publikojë njoftimin e   fituesit, që këto institucione dërgojnë për një procedurë prokurimi, nëse nuk ka vendim të dhënë nga KPP për heqje pezullimi. Në fakt, dokumenti i 2 institucioneve më të rëndësishme në vend për procedurat tenderuese ka dhënë vetëm rekomandime për institucionet, ndonëse këto janë detyrime ligjore e për pasojë autoritetet që i shkelin duhet të mbajnë përgjegjësi.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.