Integrimi europian – Vlahutin: Shteti i të drejtës, përcaktues
Këshilli Kombëtar i Integrimit Europian diskutoi të hënën udhërrëfyesin e Komisonit Europian për vendet e Ballkanit Perëndimor. Ambasadorja e Bashkimit Europian, Romana Vlahutin, tha se vendet e rajonit përballen ende me shumë sfida, ku elementi kryesor që i afron me anëtarësimin është shteti i të drejtës.
Sfidat në procesin e integrimit u nënvizuan edhe nga kryetari i Këshillit, Genc Pollo, ndërsa ministri për Europën dhe Punët e Jashtme, Ditmir Bushati, vlerësoi faktin që dokumenti i Bashkimit Europian përcakton vitin 2025, si një horizont kohor për anëtarësimin e vendeve të Ballkanit Perëndimor.
Shqipëria pret të nisë këtë vit negociatat e anëtarësimit në Bashkimin Europian, megjithatë ende ka pasiguri lidhur me hapin që mund të ndjekë ky proces. Veç aftësisë së Shqipërisë për të përmbushur kriteret e anëtarësimit, përcaktuese do të jetë fryma e vendeve anëtare të Bashkimit Europian, po të kemi parasysh se në vitet e fundit skepticizmi rreth zgjerimit ëhstë në rritje.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.