Integrimi, Hahn: BE publikon në shkurt strategjinë për vendet e Ballkanit – Rama: Shqipëria e meriton hapjen e negociatave
Është zhvilluar konferenca e përbashkët mes kryeministrit Rama dhe komisionerit Johannes Hahn.
Temë kryesore e kësaj konference ka qenë hapja e negociatave dhe ardhmja evropiane e Shqipërisë, por edhe e vendeve të Ballkanit Perëndimor.
Gjatë fjalës së tij komisioneri i zgjerimit, Hahn u shpreh se Shqipëria është në rrugëtimin e duhur dhe vlerësoi punën e bërë deri më tani. Më tej Hahn njoftoi edhe strategjinë që do të bëhet publike në muajin shkurt 2018 për vendet e Ballkanit Perëndimor, si dhe Samitin që do të mbahet në maj të 2018 në Bullgari, për të ardhmen evropiane të rajonit.
Nga ana tjetër Hahn foli edhe për procesin e vettingut, ku deklaroi se pret rezultatet e para.
“Në Shqipëri po bëhet gjithë kjo punë. Por kemi mundësi për të shkëmbyer ide, për të parë progresin, si dhe të trajtojmë sfidat që janë ende për t’u kaluar. Për procesin e negociatave bazohemi tek merita dhe mbështetemi tek faktet, jo te thashethemet dhe aludimet. E rëndësishme është të arrijmë te qytetaret dhe të flasim për progresin që ka bërë Shqipëria. Mund të bëjmë shumë më shumë për ketë, kemi diçka për të treguar një histori të re për progresin përsa i përket kultivimit të kanabisit apo uljes së numrit të azilkërkueseve në BE. Do të nxjerrim një strategji për Ballkanin Perëndimor në muajin shkurt dhe pastaj një raport për secilin vend. Më pas do të kemi një samit që do të mbahet nga Presidenca bullgare në maj të 2018, për të ardhmen e Ballkanit Perëndimor. Nga procesi i vettingut pres rezultatet e para. Nënvizoj progresin edhe për 5 prioritetet kyçe që të konsolidohen arritjet e bëra deri me tani. Të gjitha janë në rrugën e duhur, Shqipëria është në rrugëtimin e duhur. Aspiratat europiane të jetë një objektiv kombëtar, të mbështetet nga të gjitha partitë politike, shoqëria civile dhe media”, u shpreh Hahn.
Nga ana e tij kryeministri Rama deklaroi se Shqipëria meriton të hapë negociatat, por pavarësisht se si do të zhvillohet procesi, ai shprehu gatishmërinë për të vijuar më tej në këtë aspiratë.
“ T’i vëmë në dispozicion këshillit të BE një raport solid. Diskutuam me komisionerin për suksesin e qartë për luftën e kultivimit të kanabisit. Ndamë me komisionerin objektivat dhe ambicien për hapat që kemi përpara, ndaj jemi të vendosur të ecim para me task-forcën speciale dhe Operacionin Forca e Ligji, kundër krimit te organizuar. Shqipëria meriton të hapë negociatat dhe pavarësisht se si shkon procesi, ne do vazhdojmë të konsolidojmë pozicionin tone për këtë aspirtatë. Jemi të interesuar për rrjedhën e procesit të Berlinit, na jep mundësi të reja për bashkëpunimin rajonal në funksion të modernizimit të vendit tonë dhe të gjithë rajonit. Jemi të inkurajuar edhe nga zhvillimet e fundit, duke sjellë në vëmendje edhe mesazhet inkurajuese nga Presidenti Juncker, të cilin do ta takoj në fillim te Dhjetorit, pas ftesës së marrë ditën e djeshme”, u shpreh kryeministri Rama.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.